Shillong: U Director ka North Eastern Indira Gandhi Regional Institute of Health & Medical Sciences (NEIGRIHMS) mynta ka sngi Thohdieng ula pynshai ba ka Institute ka la bud ryntih ia ki kyndon thungkam kumba la pynmih ka Department of Personnel and Training (DoPT) bad pynshai ruh ia ki katto katne ki bynta ha kaba iadei bad ka jingpynrung kam ba dang iaid mynta.
Kane ka jingpynshai ka jongu ka dei halor ka jingdawa ka seng Khasi Students’ Union (KSU) bad ka Hynniewtrep Youth Council (HYC) pyrshah ia ka rukom pyniaid ka bor NEIGRIHMS halor ka jingthungkam.
U Dr Mehta ula ong ba ka jingpynmih ia ki jingpynbna laitkam ia ki kam kiba lait, kam dei ia kiba thymmai hynrei ka dei ia ki kam kiba sah nak aba rim ne ‘Backlog Vacancies’, kaba la mih na ka jingbym pdiang, ka jingbym wan trei ne ka jingbym don ia ki kyrtong kiba biang ha ki kyrdan bapher bapher ha ki jingpynrung kam kiba la leit noh.
Halor ka jingioh rung kam ki trai ri trai muluk, u Director ula ong ba ka NEIGRIHMS ka bud katkum ki kyndon bad ka jingbhah ia ki OBC bad EWS ka dei kaba la bud ryntih katkum ki kyndon jong ka Sorkar Pdeng bad ka bor jong ka ain.
Ha kaba iadei bad ka jingsngewkhia halor ka jingthungkam da ka Ratio ia ka kyrdan Nursing Officer, u Director ula pynshai ba kam shim la don kano kano ka kyndon ha ka Recruitment Rules kaba la don lypa na ka bynta ka Ratio kaba 80:20 ki kynthei bad ki shynrang.
Ha kaba iadei bad ka Centre ban pynlong iaka eksamin na ka bynta ka Computer-Based Tests (CBT) kaban pynlong da ka kompeni ka sorkar pdeng ka HLL Life Care Limited, ula pyntip ba la pynkhreh ia ki sienjam ban pdiang bun ia ki samla ka jylla Meghalaya ha ki jaka thoh eksamin ha Meghalaya bad ki kyrtong ki bym lah ban wan ialeh ha ka jylla Meghalaya, ki lah ban leh noh ha ki centre kiba don marjan, nuksa kum ha Guwahati, Assam.
U Dr Mehta ula ong ruh ba la buh ia ki tiar kiba paka ha NEIGRIHMS ban pynthikna ia ka jingshngain jong ki nongpang bad ia ka sawdong sawkun kaba shngain ha hospital khamtam eh na ka bynta ki nurse kynthei bad ki nongpang.
U Director ula pynthikna ba ka NEIGRIHMS ka ieng ban pyniaid beit ia ki kam ki jam ha ka lynti kaba khuid kaba suba bad ka jingkitkhlieh bad ka jingbud ryntih ia ki kyndon jong ka Sorkar Pdeng.
Ka NEIGRIHMS ka bud ia ki kyndon, ka jingkhot thungkam ka dei na kaba sah kaba rim, pynshai u Director
