Shillong: U Myntri Rangbah ka jylla u Conrad K Sangma ula pynpaw ia ka jingkmen halor ka jingpass bha ki khynnah kiba ialeh ia ka eksamin Matrik ne SSLC mynta u snem hadien 8 snem eiei kiba la leit ba u la iohi ia ki result.
Halor ka jingkynthoh kiwei ba ka jingpass ki khynnah haduh 87.10 percent ha ka SSLC na ka jingpyllait ka sorkar ia ka kot iarap CM Guidebook ka pynhiar dor ia ka pule pule namar ba ka shu pynbun ia ka jingpass hynrei ka pynsniew ia ka pule puthi, u myntri rangbah u la ong ba kiwei ki lah ban kren kynthah halor kane laiphew jait hynrei um kwah ban pynphai nia hynrei u sngew kmen ba ka la wanrah ia ka jingkylla ia ki khynnah.
Haba kren sha ki lad pathai khubor mynta ka sngi, u la ong ba ka CM Guidebook kam dei kaban pynpass ia ki khynnah ban long ophiser IAS mar mar kumba ki kwah hynrei ka thong ka long ba kin trei shitom bad ban pass ha ka eksamin SSLC. Ula ruh bay m tang ia ka eksamin SSLC hynrei kiwei kiwei ki eksamin ruh kum ka IIT, JEET, UPSC bad kiwei ki samla pule ki hap pule ruh ia ki guidebook ban ialeh ia kine ki eksamin.
Hynrei kaba kongsan ka long ba kampher kano kano ka kot kaba pyllait, kaba kongsan ka dei ka jingtrei shitom jong ki khynnah.
“Ngi kwah ban pynbha ia ka result bad la shim ia ki lad ki lynti ban hikai ia ki nonghikai, ban pynkhlain ia ka tnad pule puthi bad kumjuh ka jingpyllait ia ka CM Impact Guidebook. Ka kot iarap ka don ha baroh ki eksamin IIT, UPSC, JEET bad kiwei ki eksamin khnang ba ki samla pule kin lah ban sngewthuh bad ban ai ia ka jubab. Napdeng baroh ki result ba nga la iohi ha kine 8 snem, kane ka dei kaba kmen tam namar ba don u khynnah ba dang sdang ban sain dur ia ka jingim lada u phiel, ka la wanrah ka jingdum ia u. Hooid, ki briew ki lah ban ong bun jait, lait phew jait kaba sniew hynrei nga sngew kmen ba ngi la lah ban wanrah ia ka jingkylla ha ki khynnah. Kane ka Booklet kam dei ban pyllong ia ki kum ki IAS hynrei ka thong ban pynlong ia ki ban pass. Kampher kano kano ka kot kaba phi pyllait hynrei ka shong ha ki khynnah ban pynkhreh bad ka jingpas ka dei ka jingtrei shitom jong ki khynnah”, la ong u Conrad.
Ha kajuh ka por, ula ong ba ka tnad pule puthi ka dei kaba jyrthiaw bha bad na ka liang ka sorkar ka dang pynkhreh ban pynthymmai ban pynbeit ia ki kyllain.
Ki don kiba kren wohdong ia ka CM Guidebook, ong Conrad
