Shillong 07, Iaiong: U Myntri Rangbah ka jylla u Conrad K Sangma ula pyniaid ia ka jingialang ka High Level Task Force kaba nyngkong mynta ka sngi kaba la iashim bynta lang u myntri ka tnad DoNER u Jyotiraditya Scindia, kynthup ki myntri rangbah ka jylla Sikkim u Prem Singh Tamang, ka Tripura Dr. Manik Saha bad ki ophisar sorkar jylla bad sorkar pdeng.
Ka jingialang ka la iathir ban kyntiew ia ka kam jngohkai ha kane ka thain shatei lammihngi ka India.
U Conrad u la maitphang ba ki tourist na kylleng ka ri bad nabar ri kila ithuh bha ia ka North East kum kawei bad ka la donkam ba ki jylla kin iatreilang synrop synrop ban kyntiew ia ka kam jngohkai.
Ula iaroh ia u myntri ka DoNER uba la shim khia ban thaw ia ka Task Force ban phai khmat kyrpang ia ka North East ha ka kam jngohkai.
Haba kren ha kane ka jingiathir, u myntri ka DoNER u Scindia ula ong ba ka North East ka don ka spah kaba lah ban kyntiew ia ka kam jngohkai kaba iai neh bad ban plie lad ia ki samla ha ka ioh kam ioh jam ha kane ka bynta.
U ai jingmut ban shim nuksa ia ka jingpynkiew ia ka kam jngohkai na ki ri kum na ka ri Thailand, Cambodia, Vietnam bad kiwei ki ri Asia ba shathie.
Ia ka Task Force la thaw hadien ba la ai jingmut ka jingialang ka North Eastern Council (NEC) kaba 72 ha u bnai Naiwieng 2024 ha Agartala, Tripura. Ia ka Task Force la thaw ka Ministry of DoNER ryngkat ka jingiatreilang bad ka Ministry of Tourism.
Ban kyntiew ia ka kam jngohkai ha ka thain, baroh ki jylla ka North East kin don ka Tourism Circuit.
Shim nuksa na Thailand, Vietnam, Cambodia ban kyntiew kam jngohkai ha North East, ong u myntri DoNER
