Shillong: Mynta ka sngi ka KSU Umsning Circle ka la ioh bat ia kawei ka kali Sumo (ML 04 B 7082 ) ha ka por 02:30 nohphai sngi ryngkat shi smam ki mynder ri na Bangladesh.
La ioh bat ia kine ki mynder hadien ba ka KSU ka la pynap shrip hapoh ka jingialam u samla Jester Nongbet u Asst Organising Secretary jong ka KSU NKHD Unit ryngkat ka jingiasynran lem ki nongialam ka KSU Umsning Circle.
Ki don 11 ngut ki mynder ri kiba la shong ha kane ka sumo kiba la phla ba ki dei na Ri Bangladesh bad ba ki mut ban kiew sha sor Shillong.
Kine ki mynder ri na Bangladesh ki kynthup ia u Sajauddin Sheik uba 26 snem kyrta, Ka Panna kamal Husein kaba 37 snem kyrta, Ka Rabia Begum kaba 27 snem kyrta, Ka Kakoli Sherda kaba 36 snem kyrta, ka Erina din Mullah kaba 30 snem kyrta, Ka Shobha Islam kaba 28 snem kyrta, u Arafat Mullah uba 7 snem kyrta, Ka Unjilla Sardar kaba 27 snem kyrta, ka Melina Mullah kaba 15 snem kyrta, Ka Poppi Mullah kaba 25 snem kyrta, bad ka Sonia Sheik kaba 21 snem kyrta.
Ha kane ka jingioh bat ka seng, la wan tuklar noh ki pulit bad ka Seng ka la maham jur haba ki shimti ki dei ban leh ia kaba donkam bad kim bit ban kiew sha Shillong bad ki dei ban leit phai sha jaka ba ki wan namar ka Ri Khasi kam dei ka jaka ban bret ia ki mynder ri ne ki briew ba nabar.
Shi sumo smam ioh bat ka KSU ia ki Mynder ri na Bangladesh ba rung tuh sha Meghalaya
