Na ka ktem lehkai ki shrieh sha ka jaka jngohkai ba pawnam ha pyrthei

Shillong: Lehse bun kin kyndit bad kin ym ngeit hynrei lada ki iohi da la kijong ki khmat kin sa sakhi ba ka jaka kaba ieng ki mawbah mawsan, ki maw ramsong ba nep, ki riat ba jrong bad ki synrang maw, ka long pynban ka jaka jngohkai kaba pawnam ban khring satlak ka pyrthei.
Kane ka dei ha u Mawryngkhang ba hap ha shnong Wahkhen. Kane ka jaka ka paw pyrthei dang shen ha u snem 2017 hadien ba ki briew jong kane ka shnong kila poi jingmut ban pyllong kum ka jaka jngohkai shi bynta ban kyntiew ia ka ioh ka kot jong ki nongshong shnong.
Ia kane la pynwandur pynwandar da ka Tourism Promoters Trekking Society, Wahkhen. Katkum ka jingiathuh ki nongpyniaid ka Society, mynshwa katei ka jaka ka dei ka ktem kaba ju sngew tynnad bha ki shrieh, ki khiat, ki skei ban iaid ban ialehkai namar ka long kaba riat bha bad kham niar ba ki briew ki leit ban rep ban riang.
Hynrei naduh u snem 2017, ka la kylla ka ktem iaid kai jong ki briew kaba khring namar ka jingbeh ka lyer pynngad, ka jingitynnad ki riat ki ram, ki mawsiang maw ramsong, ki wah ba iohi shynna sha them.
Ia kane ka jaka jngohkai la ju tip bad bna nam da baroh kum ka Bamboo Trek ne Bamboo trail namar ka lynti iaid ban poi sha u Mawryngkhang naduh ba sdang ban iaid kjat, la shna da ki siej kaba shim por ban iaid kjat kumba 40 minit ne 1 kynta eiei.
Ha lynter ka lynti, ka don ka wah mru kaba khot ka wahrew kaba tuid shaduh Bangladesh, ki pung ba sngur kiba khring ia ki nongwankai ban sum bad jngi pynngad.
U nongkitkam ka Tourism Promoters Trekking Society, u babu Snar S Malngiang ula iathuh ba ka jingpyrshang ka Society ban pyllong kum ka jaka jngohkai sha katei ka jaka, kala wanrah ka jingkylla ha ka kamai kajih ki nongshong shnong na ka jingwan ki turis. U la ong ba ki briew ka shnong Wahkhen ki long ruh kiba pdiang sngewbha ia ki nongwankai na kylleng kynthup nabar jylla bad nabar ri.
Hynrei la kyrpad ba kiba wankai kin long kiba kitkhlieh ban ym wan ban pynjaboh ia ka mariang hynrei ban leh khuid bad phikir.