Shillong: U myntri ka tnad bording ka jylla u AT Mondal ula ong ba ha ki snem ba la leit ka jylla ka hap ha ka kyrdan D, ha kaba iadei bad ka jinglong jingman ka bording hynrei mynta ka la kiew sha ka C.
Kane ka jingnang kham biang ka rukom sam ding sha ki paidbah ka long namar ba ka MeECL ka la shim ia ki sienjam ban pynbha ha kine ki snem.
U myntri u la ong ba ka jingsam bording ha kane ka snem ka la kham bha bun shah ban ianujor bad kiwei ki snem. Mynta u snem kam don shuh ka jingpyllip ding kumba la jia ha u snem 2023, ha kaba la pyllip ding 8-9 kynta ha ka shi sngi. Mynta u snem ka jingpyllip ding ka dei tang namar ba don ka jingmaramot ia ka line bording bad ka jingthut malu mala na ka bor mariang hynrei kam don ka jingpyllip ding.
U la ong ba ka jingduh nong na ka jingsniew ki tiar, bad ka jingbym siew bai thang ding, ka la hiar na ka 35 percent sha ka 17 percent mynta u snem. U la ong ban pynkhlain ia ka tnad sam bording ka jylla, ka long ba ki paidbah bad ki kompeni ki dei ban siew thikna ia ka bai thang ding.
Katkum ka jingiathuh u myntri, ka MeECL ka don ka ram ha ka NTPC kumba 565 klur tyngka bad ia kane ka ram yn pynkhuid ha u 2026 namar ba ka MeECL ka siew man u bnai kumba 15.7 klur tyngka.
Ha kajuh ka por, u la pyntip ba ka MeECL ka la pynheh ia ki station sam ding ha kylleng ki jaka kynthup ha nongbah Shillong bad Tura, da kaba pyrkhat lypa ba ka jingnang bun ka jingdawa bording ha ka nongbah Shillong Thymmai bad ha Tura.
U myntri u la ong ruh ba shisien ba la pyntreikam da u Smart Meter, yn sa tip kaei kaba jia lada don kano kano ka jingthut ne ka jingjia ha kaba ka jingtip kan poi sha ka ophis ka MeECL ba kan pynbeit wut wut.
Halor ka jingshah kynthoh ha u nongialam liangpyrshah u Dr. Mukul Sangma ha ka por ba long ka dorbar ia ka jingbym biang ka rukom treikam ka MeECL, u Mondal ula ong ba u sngew tynnad ia ka jingai jingmut bad u kloi ban pynbeit haba don ka jingduna ne ka jingdkoh.
U myntri ula pyntip ba ka tnad ka la thied ruh 6 tylli ki kali shna bording ne hydraulic vehicle ban pyndonkam ban leit shna haba don ka jingthut ha ka bording, ka jingkyllem elektrik bad kiwei kiwei ki kam.
Hynrei kaba kongsan ka long ban pynbun shuh ia ka jingpynmih bording khnang ban pyndap ia ki jingdonkam bording ka jylla kaba nang heh nang khraw katba nang iaid ka por.
Iakhun tyngeh ka tnad MeECL ban pynbha ia ka rukom treikam, mynta u snem ym don jingpyllip ding
