Shillong: Ka tnad Excise ka jylla kala pyllong ia ka jingiathir ban pynthikna ba ka jingwan rung ki kyiad nabar kan ym lait ei ka khajna.
Ka Commissioner & Secretary ka tnad Excise, ka kong Matsiewdor Nongbri ka la ong mynta ka sngi ba ia ka jingialang la pyniaid u myntri bah Kyrmen Shylla ha kaba la iathir kumno ban buddien ia ka jingwanrah ia ki kyiad nabar, ka jingsain, haduh ba kin leit sha iew sha hat.
Ka jingiathir ka long ban buddien thikna naduh A haduh Z ha kaba yn pyndonkam da u QR code khnang ban lait na ka jingleh tuh.
Ka la ong ba baroh ki bitor ba thep kyiad kin don u QR code, khnang ban suk ban buddien lada don kano kano ka jingleh buit tuh ban die sha iew.
Ka kong Matsiewdor kala ong ba ka tnad kan ai jinghikai kaba kham paka ia ki ophisar halor kane ka sienjam kaba thymmai, ha kaba naduh ki ophis, ki jaka thep, ki jaka buh, haduh ki dukan die kin shah buddien ha kane ka rukom treikam kaba thymmai ban lait na kano kano ka jingleh thok.
Lyngba u QR Code, lah ban buddien tang da kaba shu knoit ia u budam, shano la poi ka mar, shano la die bad hangno la song. Ia kane ka kam la bynshet ha ka kompeni CMP Info System LLP, New Delhi bad yn pyntreikam ha u Jylliew ban wan.
Yn buddien u QR Code ia ka kyiad ban lait ka jingleh buit tuh
