Shillong: Ka seng Voice of the People Party (VPP) ka la sospen ia u MLA ka North Shillong bah Adelbert Nongrum bad saw ngut kiwei pat haduh lai snem kynthih halor ka nongrim ba ki ialeh pyrshah bad tam sneng ia ka party.
Kiwei pat saw ngut kiba shah sospen lang ki kynthup ia u bah Snarbor Laloo, bah Imti Jamir, bah Wilstone Sohshang bad bah bah Richinbusiness Marwein.
Ha ka kyrwoh kaba la pynmih u Dr. Kara H. Shen u Vice President ka party mynta ka sngi, ka la ong ba ka party ka la pan jingshai ha ka 1 tarik Lber 2025, na u bah Adelbert bad kine ki dkhot halor ka jingdonkti jong ki pyrshah ia ka party bad hadien ba la ioh ia ka jubab na ki, ka party ka la shem ba ha jaka ban pynpaw ia ka jingbabe bad pdiang hynrei ka la shem ba ki la pynksan nia pynban ialade bad kam don kano kano ka jingpdiang ia ka jingbakla, kaba ktah pat ia ka jingbit jingbiang ka party.
Ka shithi ka la ong ruh ba ka jinglong amrang bad pyneh jong u bah Adlebert bad kine ki saw ngut ka long pyrshah ia ka nongrim jong ka party bad hadien ba la bishar bniah, ka party ka shem ba ka jubab jong ki kam long kaba hun bad katkum ka Article III ka Clause 5 jong ka riti treikam ka party, ka la shim ia ka rai ban sospen noh syndon lai snem.
Ka State Executive Committee ka la rai ba ha kine ki lai snem, ka party ka la maham ba kine kiba la shah sospen kim lah ban bat kano kano ka kam bad kim don hok ban kam dkhot, nangta kim lah shuh ban mihkhmat ia ka party ha kano kano ka bynta, bad ka la maham ba um dei ban leh kino kino kiba lah ban ktah mationg ia ka party.
Sospen ka VPP ia u bah Adelbert 3 snem bad 4 ngut kiwei pat
