Shillong: U nongialam liangpyrshah uba dei u MDC ka Sohra u bah Titossterwell Chyne ula ai jingmut ia ka Executive Committee ka KHADC kaba ialam ka Voice of the People Party (VPP) ba kan iasaid ha ka sorkar jylla ba kan ailad ban tih maw tih shyiap da ka juk hyndai da u lyngka, mohkhiew namar ba ka jingkhang sbak ka la buh jingeh ia kiba rit baria.
Haba wanrah ia kane hapoh ka iing dorbar mynta ka sngi, u bah Titosstar ula ong ba ha ka por ba u long CEM ha 2019-20, ula dep ai jingmut sha ka sorkar jylla ba kan pynkylla ia ka Meghalaya Minor Minerals Concession Rules (MMMCR), 2016 da kaba bsuh ia ka kyntien traditional mining khnang ban plie lad ia ki nongtih maw tih shyiap kiba rit baria hynrei haduh mynta kam pat urlong satia. U la ong ba ka sorkar ka la thaw ia ka Committee halor kane bad ula kyntu ia ka EC ba kan iakren bad ka sorkar jylla khnang ban pyllait na ka jingeh ki paidbah nongtih maw nongtih shyiap.
Haba jubab halor kane, u Chief Executive Member (CEM) ka KHADC bah Shemborlang Rynjah ula ong ba ka Executive Committee kan pynbor ia ka Sorkar Jylla ba kan wanrah ia ka jingpynkylla ba donkam ha ka Meghalaya Minor Minerals Concession Rules (MMMCR), 2016 ban weng ia ki jingeh bala mad da ki nongtih par barit baria kiba pyndonkam ia ka jingtih par ka juk rim ha Jylla.
U CEM ula pyntip ba ka Executive Committee ka sa aiti ia ki jingai jingmut halor kane ka kam
ban pynrung ia ka kyntien “Traditional mining” ha ka MMMCR, 2016. Hynrei ha kajuh ka por, u la ong ba u sngew ba kan dang shyrkhei ka jingpynjulor ia ka mariang lyngba ka jingpyndonkam ia ki kor kiba khlain hynrei ka jingtih da ka juk barim ym tang ba ka pynsuki ia ka jingjot ka mriang, ka plie lad ruh ia ka lad iohkam ia ki briew.
Dei ban iasaid ka EC ha ka sorkar ban ailad tih shyiap tih maw da u lyngka
