Mawkasiang: Ka DREAM ka sngewkmen ban pynbna ïa ka jingsdang kaba jop jong ka prokram ai jinghikai kam kaba ar, kaba thmu ban pynkupbor ïa ki kynthei ha ka jingïaid lynti jong ki ban ïoh biang ïa ka jingkoit jingkhiah na ka jingkyrni u drok. Ha ka jingiatreilang bad ki jaka pyntbit ba donburom kum ka MSSDS, Don Bosco Technical School (DBTS), North-East Institute of Professional Studies (NEIPS), BIDS, bad ITI, kane ka jingialang ka la long ha ka 26 tarik u Risaw, 2025 ha New Hope De-Addiction Centre for Women ha Mawkasiang.
Ki nong shah sumar ha ka jaka pynduh jingdih buaid jong ka New Hope ki la ïashim bynta shitrhem ha kane ka prokram, da kaba pyni ïa ka jingsngewtynnat bad jingaiti kaba khraw. La pynlong ia ki jinghikai bapher bapher, kiba kynthup ia ka jingpynitynnad, ka jingshet jingbam, ka jingpynbha ia ki tiar elektrik, ka jingpyniaid bad jingmaramot kali, ka jingshet jingtiew, ka jingshna jain, ka jingtrei wire, ka jingthew jinwoh jaka, bad kiwei kiwei.
Nalor kata, ka prokram ka la pynithuh ia ki nongiashim bynta ia ki lad kamai shabar ri, da kaba pynleit jingmut kyrpang ha ki ri kum ka Japan bad Germany, ha kaba ki nongtrei kiba tbit ki donkam. La iasam ruh ia ki jingtip shaphang ki prokram ai jinghikai ba la kyrshan da ka sorkar khlem jingsiew kiba la shna khnang ban kyntiew ia ka jinglah ban ioh kam bad ka jingtbit ha ka seng kam seng jam, kaba ai ia ki kynthei ia ki jingshemphang kiba kordor shaphang ki lad ki lynti ban kiew ha ka kam kiba ki lah ban ioh.
Ki nongshah sumar ki la pynpaw ïa ka jingsngewnguh na ka bynta kane ka prokram bad ka jingkwah kaba jur ban pynrung kyrteng ha ki jinghikai bapher bapher. Ka jingsngewtynnat jong ki ka pyni ia ka jingaiti kaba shisha ban tei ia ka lawei kaba kham shai hadien ka jingkoit jingkhiah. Ka prokram kam shym la ai bor tang ïa ki nongïashim bynta da ki sap ba thymmai hynrei ka la ïarap ruh ban tei ïa ka jingshaniah, ka jinglah ban ïakhun, bad ka jinglong laitluid jong ki.
Kane ka jingthmu ai jinghikai kam, ka dei shi bynta jong ka jingthmu ba dang ïaid shakhmat jong ka DREAM ban ai ïa ki jingtbit bad ki lad ki lynti kiba lah ban neh, kiba lah ban treikam na ka bynta ki kynthei hadien ka jingkoit jingkhiah jong ki na ka jingdih drok. Da kaba pynroi ia ka jinglah ban shaniah ha lade bad ka jinglaitluid ha ka ioh ka kot, ka prokram ka don ka bynta kaba kongsan ha kaba kyrshan ia ka jingpynrung biang ia kine ki kynthei ha ka imlang sahlang, ban ai ia ki ka iktiar bad ka jingshaniah ban im ia ka jingim kaba pynhun bad kaba laitluid.
Ki nongshah sumar ki la sngewnguh ia kane ka jinglehkmen bad ki la pynpaw ia ka jingkwah jong ki ban pynrung kyrteng ialade ha ki prokram ai jinghikai bapher bapher, da ka jingkyrmen ban ioh ia ka lawei kaba shai bad kaba ai bor hadien ka jingkoit jingkhiah.
Ka jingaiti bad jingkwah jong ki kaba khlem artatien ban ioh ia ki sap kiba thymmai ka pynpaw ia ka jingaiti kaba khlain jong ki ha ka jingroi jingpar shimet, ka jingshaniah ha lade, bad ka jingpynkupbor. Lyngba kine ki prokram ai jinghikai, kim ioh tang ia ka jingnang jingstad kaba kordor hynrei ki nang tei ruh ia ka jingshaniah bad ka jinglah ban shah, ki pynkhreh ialade da ki tiar kiba donkam na ka bynta ka lawei kaba kham shai bad kaba laitluid.
Kane ka jingthmu ka dei shi bynta jong ka jingkular jong ka DREAM kaba dang ïaid shakhmat ban ai ïa ki sap bad ki lad ki lynti, kiba lah ban neh na ka bynta ki
kiba la koit na ka jingdih drok. Ka jinghikai kan pynleit jingmut ha ka jingpynroi ia ki sap kiba kyntiew ia ka jinglah ban ioh kam, ka jinglah ban shaniah ha lade, bad ka jinglaitluid ha ka ioh ka kot. Lyngba ki jinghikai ba la leh da ki kti bad ka jingpyniaid jong ki riew shemphang, yn pyndap ia ki nongiashim bynta da ki jingtip bad ki buit kiba lah ban treikam ban kyrshan ia ka jingpynrung biang jong ki sha ka imlang sahlang.
Hikai ka DREAM ia ki kynthei ban pynthymmai biang ia ka jingim
