Ka WAVES jong ka India ha u snem 2025 kan pynkylla ïa ka kam pynbyrngia ha ka pyrthei

Da u Chaitanya K Prasad
Ha ka pyrthei kaba angnud ia ki khana kiba shisha bad ki jingpynbyrngia kiba thymmai, ka India ka la pynkhreh lut ban pynkylla dur ia ki prokram ha ka pyrthei. Ka World Audio Visual and Entertainment Summit (WAVES) kam dei tang kawei pat ka nongïashim bynta ha ka liang ka media bad ka jingpynbyrngia—ka pyni ïa ka jingïohi jngai kaba pynkylla kaba batai biang kumno ki nongthaw, ki nongthaw polisi, bad ki nongpeitkai ha kylleng ka pyrthei ki peit ia ki prokram. La buh ban pynlong naduh ka 1-4 tarik u Jymmang, 2025, ha Mumbai, ka WAVES ka long kum ka sienjam kaba iohi jngai kaba la shim da ka tnad Information & Broadcasting na ka bynta ka jinglong jingman na ka bynta ki nongthaw, kaba wanrah ïa ka kyrdan kaba thymmai na ka bynta ki jingïalang pynbyrngia ha ka pyrthei.
Da ki phew snem, ka India ka la long ka ri kaba donbor ha ka jingïathuhkhana, kaba la khring ïa ka pyrthei da ki phlim, ki jingrwai, bad ki prokram digital jong ka. Hynrei, wat hapdeng ka jingmih kaba thymmai jong ka, ka ri ka la kham duna ia ka jingbuh ia ki kyndon jong ka jingïadei ha ka kam pynbyrngia ha ka pyrthei. Ka WAVES ka wad ban pynkylla ia kata ka jingiathuhkhana. Kane kam dei tang ban pyni ia ka jingstad jong ki nong India—ka dei ban pynwan dur ia ka jingiakren ha ka pyrthei shaphang ka media, ki jingpynbyrngia, bad ka teknoloji. Lada ka Davos ka dei ka pdeng jong ka polisi ba iadei bad ka ioh ka kot bad ka Cannes ka dei ka jaka kyntang jong ka kam shna phlim, ka WAVES ka thmu ban batai ïa ka lawei jong ka jingpynbyrngia lyngba ka jingthaw ïa ki jingpynwandur bad ka jingïatreilang jong ki nongshim bynta ba kongsan- ‘Ka Sangam jong ka jingstad ha ka kam saindur’.
Ka WAVES kam dei tang shaphang ka buit treikam kaba heh—ka dei shaphang ki lad ki lynti kiba shisha na ka bynta ki nongthaw, ki kam khaii, bad ki nongbei tyngka. Ka Bharat Pavilion kan rakhe ïa ka pateng jong ka jingïathuhkhana jong ka India, da kaba wad ïa ka jingkylla jong ka naduh ki khana ba hyndai bad ki khanatang hyndai haduh ki jingthoh ba la pynïaid da ka AI bad ka jingïathuhkhana lyngba ki lad digital. Kane ka dei ka India kaba iathuh ia ka pyrthei: ki khana jong ngi ki long kiba khlem por, hynrei ka jingiathuhkhana jong ngi ka long kaba thymmai. Ha kajuh ka por, ka WAVES Bazaar, ka iew kaba nyngkong eh ha ka pyrthei kaba pynlong baroh shisnem, ka la buh ban pynkylla ia ka rukom thied, die bad sam ia ki jingdon jingem. Da kaba ïaid shabar jong ka rukom ïoh mar tynrai ba la pynïaid da ki tamasa, kane ka rynsan digital ba nyngkong kan pynlah ïa ki jingïaid ïew ba man ka por ha ka pyrthei, kaba pynthikna ba ki nongthaw ïa ki jingthoh na India bad shabar kin ïoh ïa ka lad ban ïoh ïa ka rukom pynmih pisa kaba man ka por.
Ki jingjop ba dang shen kum ka “Dune: Part Two” kaba la jop ïa ka Oscar 2025 na ka Best Visual Effects bad ki jingnoh synñiang ba kongsan jong ka VFX jong ka ri India ki pyni nuksa ïa ka jinglah ban thaw jingthaw ba ka WAVES ka thmu ban pyni bad kyntiew ha ka rynsan kylleng ka pyrthei. Hynrei palat ia baroh ki jingiakren jong ka kam, kaei kaba pynlong ia ka WAVES kaba pher shisha ka long ka jingthmu kaba heh jong ka. Kane kam dei ka jingjia kaba jia tang shisien—ka dei ka rukom treikam kaba jrong samoi ban buh ia ka India kum ka jaka treikam jong ka pyrthei jong ka jingsaindur thymmai ha ki kam pynbyrngia. Katba ka kam M&E kylleng ka pyrthei ka nang kiew sha ka $3 trillion ha u snem 2030, ka India ka pynlong ia ka kam jong ka ym kum ka jaka ai kam shabar, hynrei kum ka nongialam ha ka pyrthei ha ka jingpynmih ia ki jingpynbyrngia, ka polisi, bad ka jingbei tyngka. Ka jingpyniasoh lang jong ka summit ia ka jingthaw ia ki jingthoh, ka jingai pisa, ki jingiakren halor ki polisi, bad ki teknoloji kiba dang mih ka pynlong ia ka kum ka jaka sdang na ka bynta ka lawei jong ka kam pynbyrngia.
Ki jingthmu jong kane ka jingialang ki long palat ka jingpyni ia ka sap ban kyntiew ia ka jingiatreilang hapdeng ki ri lyngba ka Global Media Dialogue. Kane ka sienjam jong ka jingïadei bad kiwei ki ri, ka thmu ban wanrah ïa ka jinglong kaba pynïasoh ïa ki nongsaindur bad ki nongshim bynta ha ka kam karkhana ha kylleng ki dewbah hapoh ka jingïalam jong ka India. Ka Global Media Dialogue kan poi sha kaba kut ha ka ‘WAVES Declaration 2025’—ka lynti kaba don jingthmu na ka bynta ka media bad ki paralok ha ka kam pynbyrngia ha ka pyrthei ka ban seng ïa ka nongrim na ka bynta ka World Entertainment Forum kaba iaineh. Kane ka jingpynbna kan pynbeit ia ki jinglong bad ki jingeh kiba kongsan jong ka karkhana katba ka tyrwa ia ki rukom treikam kiba kynthup lang kiba ai jingmyntoi ia ki nongsaindur ha kylleng ka pyrthei.
Kawei na ki sienjam ha ka WAVES ka dei ka WaveXcelerator, ka jaka pynkhlain ia ki startup ba la shna kyrpang na ka bynta ki nongseng kam. Da ka jingkiew jong ki kam ba la pynmih da ka AI, ki media, bad ka jingsaindur virtual, ka jingdonkam ïa ka jinghikai ba la buh ryntih, ka jingai pisa, bad ka jingïoh rung sha ki iew kam pat ju long kaba khraw kumne. Ka WaveXcelerator ka pynthikna ba ka India kam pynroi tang ïa ka jingïathuhkhana kaba thymmai hynrei ka tei ruh ïa ki kam ki jam ki ban batai ïa ka phew snem ban wan jong ka kam pynbyrngia. Da kaba pyniasoh ia ka jingpynsuk ia ka jingbei tyngka bad ka jingiada ia ka intellectual property, ka India ka pyni sha ka pyrthei ba ka shimkhia ban thaw ia ka ioh ka kot kaba iaineh.
Ka bynta kaba kongsan jong ka WAVES ka long ka jingphaikhmat jong ka ha ka jingwad ia ki sap bad ka jingai jingmut. Lyngba ki Create in India Challenge jong ka, ka jingïalang ka la dep ban ithuh ïa 725 ngut ki nongsaindur ba ha khlieh duh ha ka kam gaming, ki comic, animation, ki jingrwai, ki esport, bad ka jingpynbna paidbah. Kine ki sap ba la jied kin ïashim bynta ha ka CreatoSphere, ka jaka ïakren kaba dap da ki jingïakop, ki masterclass, bad ki projek ïatreilang, ban pynthikna ba ki sur thymmai kiba bha tam ha ka jingpynbyrngia kin mih na India bad sha ka pyrthei. Kane ka jingpynbiang ïa ki sap ba la buh ryntih ka pyni ïa ka jingangnud jong ka India ban ym long tang ka jaka buh jingtip, hynrei ka jaka pynïaid ïa ki sap.
Ka Thought Leaders Track jong ka jingïalang kan pynïasoh lang ïa ki CEO, ki media executive, ki nongthaw polisi, bad ki nongsdang ia ki jingsaindur ban ïakhun ïa ki katto katne ki jingkylli kiba kongsan tam ha ka kam pynbyrngia mynta: Ka lawei jong ka jingïathuhkhana ka long kumno? Kumno ka AI kan pynkylla dur ia ka jingthaw ia ki jingthoh? Kiei ki rukom pynmih pisa thymmai ki ban batai ia ka juk jong ka jingpynmih pisa? Kumno ngin pynïahap ïa ka jingthaw bad ka jingpynbeit ryntih? Kine kim dei tang ki kyntien ba pawnam ha ki jingïalang—ki dei ki jingïakren ba shisha kiba pynwandur ïa ka lawei jong ka kam pynbyrngia, bad ka WAVES kan long ha ka bynta kaba kongsan jong kine ki jingiakren.
Ki jingthmu ba kongsan jong ka WAVES ki ïahap bha bad ki jingdonkam jong ka karkhana ha ka pyrthei: ban wanrah ïa ka jingroi jong ka kam, ban kyntiew ïa ka jingpynwandur lyngba ki kor ki bor kiba dang mih kum ka AI bad ki jingïakynduh ba don jingmut, ban pynkupbor ïa ki samla kiba don sap, bad ban pynsuk ïa ka jingïasam ia ka deiriti kaba don jingmut hapdeng ki riew shemphang ha ki kam media jong ka ri India bad ka pyrthei. Ki jingmyntoi ki long palat ia ka jingialang hi. Ka WAVES ka buh ia ka India ha ka kyrdan ban khring ia ka jingbei tyngka kaba heh ha ki kam pynmih prokram jong ka, ban pynskhem ia ka jinglong nongialam jong ka ha ka kam pynbyrngia kylleng ka pyrthei, ban pynkhlain ia ka jingnoh synniang jong ka sha ka ioh ka kot na ka kam pynmih prokram ha ka pyrthei baroh kawei, bad ban kyntiew ia ki nongtrei kiba tbit kiba la pynkhreh na ka bynta ki jingdawa jong ka kam ha ki por ban wan. Da kaba pynleit jingmut ha ki bynta bapher bapher—naduh ka kam pynmih prokram bad ka jingbei tyngka ha ka gaming, animation, ka put ka tem, bad ka jingshna ia ka IP—ka WAVES ka pynbeit ïa ki jingeh ha ka kam media bad kam pynbyrnia bad ki lad ki lynti kiba don ha ka pyrthei kaba la kiew bha ha ka kam pyniasoh.
Katba ngi dang jan sha ka 1 tarik u Jymmang, 2025, ka pyrthei ka la peit bniah bha. Ka WAVES kam dei tang ka jingialang jong kito kiba trei ha ki kam media—ka dei ka jingiakhih. Ka jingiakhih ha kaba ka jingsaindur ka iakynduh ia ka khaii pateng, ka dustur ka iakynduh ia ka teknoloji, bad ka India ka iakynduh ia ka pyrthei ha la ki jong ki kyndon. Ka kam pynbyrngia ka don ha ka por jong ki jingkylla, bad ka India ka pynthikna ba ynda la thoh ïa ka lynnong kaba bud, yn thoh da ki dak kiba heh, da kaba buh ïa ka WAVES ha ka bynta kaba pdeng jong ka.