Shillong: Ka jingai jinghikai ia ki Village Defence Party (VDP) kaba la pynlong da ka DREAM ha ryngkat ka jingiatreilang bad ka tnad Pulit Meghalaya, ka la long kaba jop ha Conference Hall jong ka Directorate of Social Welfare, Lachumiere, ha ka por 3 PM. Ka jingialang ka la long kum ka rynsan kaba kongsan ban iakren ia ka bynta bad ka jingtreikam jong ki VDP ha kaban tehlakam ia ka jingdih drok bad ki kam runar kiba iadei bad u drok ha ka Distrik bad ka nongbah Shillong baroh kawei.
La pynshongkun ïa kane ka jingïalang da ka jingdon lang jong I Bah Vivek Syiem, Superintendent of Police, East Khasi Hills Distrik, ha ryngkat U Honorary Adviser jong ka VDP, ki ophisar ka Social Welfare, ki nongkitkam jong ka DREAM bad ki nongmihkhmat bapher bapher jong ka imlang sahlang, kynthup ïa ki Rangbah Shnong, ki Seng Longkmie, bad ki Seng Samla. Ki nongialam jong ki kynhun VDP bapher bapher na kylleng ka East Khasi Hills Distrik ruh ki la iashim bynta shitrhem ha kane ka jingialang.
Kumba 80 ngut ki nongiashimbynta na ki shnong/dong bapher-bapher bad ki VDP, ka jingïalang ka la long kum ka rynsan ban ïamir jingmut kiba jur halor ki buit treikam bad ki jingpyrshang ban ïatreilang bad ban kyntiew ïa ka jingtreikam jong ki VDP ha kaban weng ïa ki jingeh kiba ïadei bad u drok bad ban wanrah ia ka jingshngaiñ ha ki shnong ki thaw. Ki nongiashim bynta ki la iatai, iathir bad ai jingmut halor ki jingeh ba ki shem bad kumno ban wad lad, wad lynti ban teh lakam ia u Drok ha ki shnong ki thaw.
Ki jingiakren ki la pynpaw ia ka jingdonkam jong ka jingiashim bynta lang jong ki paidbah, ka jingiatreilang bad ki bor pynjari ain, bad ki jingpynsngewthuh paidbah ha kaba ialeh pyrshah ia ka jingdih drok.
U SP, Vivek Syiem u la ïaroh ïa ka jingpyrshang jong ki VDP bad ban pynkhlain ia ka jingïatreilang kaba neh bad ki lad ki lynƟ kiba shimkhia ban ïada ïa ki dong jong ka Distrik bad khamtam ka nongbah Shillong.
Ka jingpynkut kaba jop ia ka jingialang ka la pyni sa kawei pat ka mawjam ha ka jingiakhun pyrshah ia ka jingdih drok bad ki kam runar ha Shillong, da ka jingkut jingmut kaba thymmai na baroh ki nongshim bynta ban iatreilang na ka bynta ka imlang sahlang kaba kham shngain.
Da ki VDP yn pynjur thma ka sorkar ha Nongbah Shillong pyrshah ia u drok
