Shillong: U Bah Damanbait Lamare MLA ka Umroi Constituency ha ka miet sngi Palei ka 20 tarik Lber 2025 u la kitbok kitrwiang ïa ki khynnah ïalehkai jong ka Myngken Christian Higher Secondary School kiban sa leit mihkhmat ïa ka ri India sha ka lympung ïalehkai football ha France.
U Bah Damanbait ha ka jingwan ïakynduh kyrpang ïa ki khynnah jong ka Myngken hapoh hostel ha Polo, u la kitbok kitrwiang da kaba noh synñiang da ka song pisa kaba 1 Lak tyngka bad la aiti ha u Bah Carmel Ramshon uba dei u Team Manager ha ka jingïadonlang u Principal jong ka skul u Bah Everlasting Pyngrope.
U Bah Damanbait Lamare haba ai jingkren u la pynpaw ka jingsngewkmen ba kane ka skul kaba leit ïakhun sha France kadei ruh na ka constituency kaba u mihkhmat bad ai mynsiem ruh ïa ki khynnah ba kim dei ban tieng ban syier hynrei ban ïakhun beit triang khnang ban ïoh khur ïa ka nam jop.
Une u MLA uba la ju ïadonlang bad kane ka kynhun kaba la poi sha ka phainal ha ka Subroto cup 2024 u da thrang ba ka kynhun haba ka wanphai na France kan wanphai ryngkat bad ka trophy, kumta u kyntu ba kin ïalehkai bha khnang ba kan long ka burom ïa ka ri, ïa ka Jylla bad ïa ki kmie ki kpa.
Kane ka kynhun ïalehkai jong ki khynnah shynrang jong ka Myngken Christian Higher Secondary School U-17 kan sa leit ban mihkhmat ïa ka ri India sha ka lympung ïalehkai football ka Indo-French Football Tournament ha Paris bad kan sa mih na la ka jong ka ri ha ka 24 tarik mynta u Lber 2025. Ka Myngken Christian Higher Secondary school ka la ïoh ban mihkhmat ïa ka India sha katei ka lympung kadei hadien ba ka la wan ba ar ne runners up ha ka 63rd Subroto Cup 2024.
Yn ïalam ïa kane ka kynhun da u Bah Bobby L Nongbet, DSO Nongpoh (AFC A Licence), kum u Head Coach, ha ryngkat u Bah Kitborlang Kharlukhi kum u Assistant Coach, u Bah Carmelius Ramshon kum u Team Manager bad u Principal jong ka skul Bah Everlasting Pyngrope.