Shillong: U heh barim ka National Disastar Management Authority (NDMA) u Lt. Gen. Syed Ata Hasnian ula maham ba katba nang wan ki karkhana, ki surok, ki kad liengsuin bad kiwei ki kam jong kane ka juk, katta ruh ka jingjia kan nang mih.
Ka tnad Revenue & Disaster Management Department bad ka Meghalaya State Disaster Management Authority ryngkat ka National Disaster Management Authority jong ka tnad Home Affairs, ka sorkar India ka pyllong ia ka jingai jinghikai halor kumno ban iada haba khyrwit ka bor mariang, ne haba wan kano kano ka jingjia mynta ka sngi ha Shillong.
U Syed Ata ula ong ba ka ri ka la mad shibun ki jingjia na ka bor jong ka mariang hynrei haba la pynkhreh kumno ban iada, kan kham lait na ka jingjulor. Ban iada na ka jingshah pynjulor ha ka bor mariang, ka donkam ban iatreilang hapdeng ki tnad bapher bapher kum ka tnad bording, ka tnad peit suin bneng bad kiwei kiwei.
U la ong ba kane ka sobjek kan long kawei kaba donkam tam ha ki skul bad ki college ha ki sngi kiban sa wan. U la ong ba kaba donkam ka long ba ki nongshong shnong ki dei ban tip bad ka jingnang ban iada nyngkong haba mih kano kano ka jingjia.
U Syed Ata u la ong ba ki nongshong shnong ki dei ban don ka SACHET app kaban ai jingtip halor ka jingwan ka eriong bad ka lynti iaid jongka, khnang ba ki briew kin tip kumno ban iada lypa.
Kat nang bun ki karkana, ki surok, ki liengsuin, nang jur ka jingma, ong u heh NDMA
