Shillong: La ioh jingtip ba 2 ngut ki khynnah na Meghalaya kila khlad hadien ba la kem pang na ka jinglong bih ka bam ha jaka ba ki sah ha Karnataka.
La ioh jingtip ba une u khynnah uba khlad u dei na thain Nongstoin, West Khasi, uba dei uwei napdeng kiba shitom ha katei ka jingjia.
Lah ban pynkynmaw ba hynnin ka sngi, u khynnah uba la tip kyrteng kum u Khrehlang Khongtani ba shong klas VII u dei na ka Shnong Lyndem, Pynursla Sub Division, ula khlad halor kane ka jingjia.
U myntri rangbah ka jylla u Conrad K Sangma ha ka social media jong u, u la pynpaw ia ka jingsngewsih ban ioh khubor ba sa uwei u khynnah ula khlad noh. Ula pynbna ruh ba ka sorkar kan ai jingiarap T. 3 lak sha kiba haiing uba khlad bad kan bei ia ka jingshah sumar jong kito kiba dang shitom.
Haduh 28 ngut ki khynnah kynthup 23 ngut na Meghalaya kila kem pang halor ka jingsuba ba long bih ka bam kaba kila bam bad, uwei ula khlad noh. Kane ka la jia ha ka sngi U Blei ha ka Residential School, Gokul Educational Institution ha shnong T Kagepura ka Mandya District ka Karnataka.
Ha kane ka jaka pule ki don 23 ngut ki khynnah na Meghalaya na ki 202 ngut kiba wan pule.
Halor kane ka jingjia, ka tnad pule puthi ka Meghalaya ka la phah ia ar ngut kynthup ia u Bah P Sunn, Sub Inspector of School, Sub Divisional School Education Officer, Shillong bad u bah R Kharsyntiew, District MIS, PM-POSHAN, Shillong.
La kynnoh ba ka jingioh pang kynsan jong kine ki Khynnah skul kala wan jia hadien ba ki iabam ia ka jingbam bala wanrah da ki bor pyniaid ka Hotel, kaba dei ka bam ba tam na ka jinglehkmen Holo na ki jaka ba marjan.
Ha kajuh ka por, ki pulit ka Mandya District kila kem 3 ngut ki briew halor kane ka jingjia bad katkum ka jingtip, kiba shah kem ki dei u trai katei ka skul bad u warden bad ka jingtohkit ka dang iaid.
Khlad 2 ngut ki khynnah na Meghalaya ba long bih ka bam ha Karnataka, shah kem 3 ngut
