Shillong: U myntri rangbah ka jylla u Conrad K Sangma ula plie ia ka thup ne Block tih dewiong da ka tiar stad mynta kaba nyngkong ha shnong Saryngkham-A, Byndihati, East Jaintia Hills.
U Conrad ula plie da ka video mynta ka sngi, namar ba um lah ban don ha katei ka jaka na ka jingbunkam. Haba kren lyngba ka Video conferencing, u Conrad u la ai khublei ia ki nongtrei ka sorkar, ki trai par dewiong, kiba ioh License khamtam ia u bah Dapmain Shylla na Byndihati uba dei u nongioh License ban tih dewiong katkum kane ka juk stad mynta.
U la ong ba ha u snem 2018 haba u shimti ia ka shuki Myntri Rangbah ula shim khia bha ban pyllait ia ka jingshah khang na ka jingtih dewiong bad mynta kane ka la pynmih soh da ka jingioh ban plie ia kane ka 1st Scientific Mining Coal Block ha Meghalaya. U la ong ba sa kiwei ruh kin sa ioh shen ban sdang tih dewiong hadien ba kila lah ban pynbiang ia ki jingdonkam.
“Mynta ka sngi hadien jin kumba shiphew snem ba la khang tih dewiong ha Meghalaya, ngi la lah ban plie ia ka jaka tih dewiong da ka juk stad thymmai bad ka dei ka sngi ba kyrpang tam ia ki paidbah ka Meghalaya. Kiba bun ki riew shimet, ki kynhun, ki trai par bad kiwei kiba shaniah ha u dewiong, kila iakynduh jingeh hynrei mynta ngi la lah ban pyllait na kane ka jingeh”, la ong u Conrad.
Ula ong ba ka sorkar kan iakren bad ka sorkar India ban thaw lad ban plie lad ruh ia ki nongtih dewiong kiba rit ki bym lah bor.
Kiwei pat kiba don lang ha kane ka jingplie ia kane ka jaka tih dewiong juk jingstad saian ki long u bah Kyrmen Shylla, myntri sorkar, ka MLA ka Sutnga-Saipung kong Santa Mary Shylla, bad kiwei ki heh sorkar bad u Executive Member, Jaintia Hills Autonomous District Council (JHADC), bah Hambertus Nongtdu, Deputy Commissioner, East Jaintia Hills District, Shri Shivansh Awasthi bad kiwei.
Hadien 10 snem, plie u Conrad ia ka thup tih dewiong juk stad mynta ba nyngkong ha Saryngkham-A
