Shillong: U myntri rangbah ka jylla u Conrad K Sangma ula pyntip hapoh ka iing dorbar ba ka sorkar ka dang pan jingmynjur na ka Ministry of Environment and Forest (MoEF) ban pynjynsuk ia ki kyndon khnang ban pyllait ia ki nongtih maw, tih shyiap kiba rit baria bad kiba pyndonkam da ka rukom tih kaba rim khlem da pyndonkam da ki kor ki bor mashin.
Ia kane ka jingkylli la wanrah u MLA ka Mawryngkneng u bah Heavingstone Kharpran uba kwah ban tip kaei ka jinglong jingman ka rukom tih maw, tih syiap ha ka jylla.
U Conrad u la ong ba la pyrkhing bha ia ka jingtih maw tih shyiap katkum ka Meghalaya Minor Minerals Concession Rules 2016. Kane ka rule ka long kaba jwat bha ia ki nongtih maw tih shyiap kiba rit baria namar ba ka don bun ki kyndon bad halor kane, bad hadien ba ka sorkar ka la ioh jingud na ki MLA bad ki nongtih maw, tih shyiap, ka la thaw ia ka Committee bad kane ka Committee ka la ai jingmut sha ka sorkar ia ki lynti ban pynjynsuk.
Katkum ka jingong u myntri rangbah, ka sorkar ka dang pan ia ka jingmynjur na ka MoEF khnang ba ka sorkar kan lah ban iaid shakhmat. U la ong ba ka sorkar ka kwah ba ki nongtih maw, nongtih shyiap kiba rit bad kiba pyndonkam da ka juk barim, ki dei ban ioh permit tang da ka NoC na u Rangbah Shnong bad na ka Forest Clearance na ka tnad Forest lada dei ka jaka kaba long khlaw.
Dang pan jingmynjur ka sorkar ka MoEF ban pynjynsur ia ka jingtih maw, shyiap hyndai
