Shillong: U MLA ka Nongkrem u bah Ardent Miller Basaiawmoit u la kynthah ia ka jingpaw ha ki social media baa r ngut ki Adviser ka sorkar MDA-2 ki leit peit kai kriket sahuh shaduh Dubai.
Haba shim bynta ha ka jingiathir halor ka mang tyngka 2025-26, u bah Ardent ula kwah ban pan jingshai na ka pisa jongno kine ki pyllut ban leit sha katei ka ri, namar ba ki dei ki briew jongka sorkar.
Lah ban kdew ba ar ngut ki Adviser kynthup u bah HM Shangpliang bad bah Hamletson Dohling ki leit peit kai kriket sha Dubai kumba la saphriang ha ki social media.
Ha kajuh ka por, u bah Ardent ula kynnoh ba ki Consultant kiba thung ban leh ia ki kam, ki bunkam ban ialehkai PUBG. Ha kajuh ka por, ki kam ba dei ban leh ki ophisar, kila knieh noh ia ki kam jongki.
U bah Ardent ula rah ruh ia ka jingleh shiliang ka sorkar ha ka rukom ai skhim khamtam ha kaba iadei bad ka MLA skhim, ha kaba la ai tang ia ki briew kiba don ha ka party kaba don ha ka bor. U la ong ba haduh mynta um pat ioh pisa na ka CMDF, watla u CM ula ong ba ka skhim ka kynthup ia baroh hynrei ka jingshisha ka paw ba ka sorkar ka shu jied bad leh shiliang ia ki MLA ki bym dei ha ka liang ka sorkar.
Shuh shuh u la ong ba ka jingbun palat ka ram ba ka sorkar ka shim ka long ka jingma ia ka jylla, kumba la maham u CAG namar ba ka jylla Meghalaya kam dei kaba riew spah hynrei kiba bun ki skhim la shu shaniah na ka sorkar pdeng.
U la pan jingshai ruh halor ka jingbym ai pisa ka sorkar sha ka KHADC da kaba ai daw ba la dep pyndonkam ha ka elekshon MDC hynrei ha JHADC pat kam long satia kumta.
“Ngi la shah iaid lait haba pyntreikam ia ki skhim ha ka konstitwensi,ha kaba ngim pat ioh jingmang pisa na ka sorkar halor kane ka CMYDF, nangta na ka CM Housing ruh la shna ban ai jingiarap tang ia kiba iadei bad ka party kaba don ha ka bor bad kane ka dei ka jingibein ia ki paidbah ka Nongkrem kiba la jied ia u nongmihkhmat. Ka jingai kyrteng Chief Minister ka pyni ba ka sorkar ka peit tang ia ki briew kiba dei na ka party ha ka bor”, la ong bah Ardent.
U la bynrap, “Ka jingai pisa sha KHADC, ka sorkar jylla kam ai eiei halor ka nongrim ba ka pisa la dep pyndonkam ha ka elekshon MDC hynrei kam long ha JHADC bad ula pan jingshai halor kane”.
Ka jingshaniah tylli tylla ha ki skhim ka sorkar pdeng, ka lah ban buh jingeh ia ka jylla kaba shim ram bun bha ban siew. Ka ram kaba la shim ka sorkar naduh 2018 haduh 2025, ka la kiew bun shah katba ka jingsiew ram pat ka duna bha. Ka sorkar ka dei ban trei katkum ka bor. Dei ban sangeh mardor ia ka jingpyllut phut mardor.
La ioh jingtip ruh ba ka don ka jingkhaii beain ia u dewiong ha North Garo Hills ha kaba ki check point kim talasi eiei bad man ka miet 200 trok eiei ki trok ki iaid sahuh sha Assam. La don kiba pyntip ba ki don ki video ruh halor kane ban pynshisha.
U bah Ardent ula ong ba la maham ruh u CAG ia ka ram ba ka jylla ka la don ha ka jingma na ka jingbun palat ka ram.
Ka jingiohi ki paidbah ia ki briew ka sorkar ha Dubai, ka la buh jingkylli ia ki ar ngut ki adviser ka sorkar jylla ki leh kmen sahuh ba ki leit peit kriket ha Dubai, bad la ki pyndonkam da ka pisa lajong ne na ka sorkar.
Ka jylla kaba duk, ka ram pat dap haduh niuhmat rynjain, pan jingshai u bah Ardent
