Shillong: U myntri rangbah ka jylla u Conrad K Sangma ula ong ba ka sorkar kan thaw ia ka Committee ban don lang baroh ki seng sain pyrthei, ki sengbhalang ban iasyllok halor ka jingdawa ban pyllong ia ka Tura kum ka Winter Capital.
Haba kren sha ki lad pathai khubor mynta ka sngi, u Conrad ula ong ba kane ka Committee kan iasyllok bad pan jingmut na ki paidbah. U la ong ba ka jingmut ka Winter Capital ka long ban don ka jaka treikam, ban pyllong dorbar tlang. Ha kajuh ka por, ka sorkar kan tei ia ka Administrative Complex kaban lut T.170 klur ha Tura bad ha kiwei ki jaka kum ha Jowai.
Shwa ia kane, u Dr. Mukul Sangma u nongialam liangpyrshah ha iing dorbar, ula wanrah ia ka rai ban pan ia ka jingmynjur ka iing ban pyllong Winter Capital ha Tura hynrei ula weng noh ia ka hadien ba la ioh ia ka jingkular na ka sorkar ba kan eksamin halor kane ka kam.
Yn thaw Committee ban pan jingmut halor ka Winter Capital ha Tura, ong u Conrad
