Shillong: U nongialam ka liangpyrshah u Dr. Mukul Sangma mynta ka sngi ula wanrah da ka rai ban pan ia ka jingmynjur ka iing dorbar thawain, ban pyllong Winter capital ha Tura.
Haba wanrah ia kane ka mat mynta ka sngi ha ka dorbar, u Dr. Mukul u la ong ba ula wanrah ia kane ka mat ka long ka jingthmu ban wanrah ia ka thong jong ki nongialam ba mynshwa ban iasam ia ka jingmut ka jinglong kawei kum ki jaitbynriew ha ka jylla ba kynthup ia ka Garo, Khasi bad Jaintia.
U Dr. Mukul u la kyrshan ruh ia ka jingleh ka sorkar ban pyllong ia ka cabinet ha kylleng ki jaka kum ha Jowai, Sohra bad ha kiwei ki jaka bad lada long lei, kan bha ban pyllong ia ka dorbar ruh.
Ula kyntu ia ka sorkar ba kan eksamin ia kane ka mat kaba ula wanrah ban pyllong dorbar tlang ha Tura bad ban pyllong dorbar ha kiwei ki jaka ruh jong ka jylla. U la ong ba kane ka mat kaba ula wanrah kam dei ka jingleh politik hynrei ka dei ka jingkwah jong ki paidbah ban iasam lem ia ka jingsngew long kawei ban wanrah ia ka jingiaieid bad ka jingiatylli hapdeng ki jaitbynriew ha ka jylla.
Pan jingmynjur u Dr. Mukul ban pyllong Winter Capital ha Tura
