Shillong: U myntri rangbah ka jylla u Conrad K Sangma mynta ka sngi u la jubab hapoh ka iing dorbar ba ka jingthew lyer ne ka Air Quality Index (AQI) kaba la kot sha ka 341 katkum ba paw ha ka khubor Times Of India, ka dei kaba la shim na ka Assam.
Haba jubab ia ka mat kaba la wanrah u MLA ka Jirang u bah Sosthenes Sohtun, u Conrad u la ong ba ia kane ka jingthew la shim na ka data kaba buh ha Central Academy, Assam, Byrnihat, ym na Meghalaya. Ka Byrnihat ha Assam ka don ha ka dak saw ha ka jingjaboh ka lyer bad ka Central Control Pollution Board, ka la ai dak jingmaham ia kane ka jaka kaba hap sha Assam.
U la ong ba na ki saw tylli ki station ha Meghalaya, ka AQI ka long kaba biang ha ki 3 tylli ki jaka bad ka kham kiew tang ha kawei ka jaka. Ka Meghalaya State Pollution Control Board ka la pyllong ia ka jingjurip kyndit ha ki bnai ba la dep bad ka la lap ba ka don ka jingpynkhein kyndon da ki karkhana bad la shain kuna ia kiba pynkhein.
U la ong ba ki don ar tylli ki jingwad bniah, bad ka la lap ba ka don ka jingjaboh ka lyer ha baroh liang, kata ka Meghalaya bad ka Assam bad ym lah ban kynnoh tang ia kawei hynrei baroh ar tylli ki jylla ki dei ban iatreilang.
U myntri rangbah u la ong ba ka khubor kaba tyngeh sha ki karkhana ha ka jylla ba ka MSCPB kan pyllong ia ka jingjurip kynsan bad kiba pynkhein ia ki kyndon, yn shim kam beit mardor.
Ka jingthew ba sniew ka lyer ha Byrnihat dei ba shim na Assam, ong u Conrad
