Shillong: U myntri rangbah ka jylla u Conrad K Sangma ula ong ba ka don ka jingmutdur bakla jong ki paidbah ba ka dei ka jaka khlaw ba ka sorkar kan shna ktem karkhana ha Byrnihat, Ri-Bhoi. Ha ka jingshisha, kane kam dei ka jaka khlaw.
Haba jubab halor ka mat kaba la wanrah u MLA ka Mawryngkneng bah Heavingstone Kharpran ban pyrshah ia ka jingthmu shna ktem karkhana ha Byrnihat hajan ka CTI, u Myntri Rangbah u la ong ba haduh mynta ka sorkar ka kwah ban aiti ia ka jaka na ka tnad Soil and Water Conservation sha ka sorkar ban ai biang pat shawei ka jaka bad ka sorkar kan lah ban thaw ia kiwei ki kam ha katei ka jaka kaba la shu sah ei.
Ka jingheh jong kane ka jaka ka long 137 akar, ha kaba 127 akar jong ka Soil and Conservation bad 10 akar jong ka Horticulture.
U la ong ba kumba 55.9 percent ka dei ka jaka ba long khlaw bniap bad kano kano ka projek ba ka sorkar kan leh, ka leh ia ka jingwad bniah ia ka khlaw ka btap bad ka jingktah ia ka mariang.
Hynrei ha kajuh ka por, u la ong ba ka sorkar kan ym iaid shakhmat ia ka mon jong u paidbah bad ka sorkar kan iasyllok shwa bad ki paidbah bad kan ym thom da ka bor. Ha ka jingshisha, ka sorkar ka kwah ban shna karkhana song jingtih bad ia ka karkhana siej hynrei kiba thmu ban bei pisa la leit noh sha Garo na ka jingeh.
U Myntri Rangbah ula ong ruh ba ka Meghalaya Promotion Investment Agency kan ym iaid lait ia ka Meghalaya Land Transfer Act.
Ka dei ka jingmutdur bakla ki MLA ha jingshisha kam dei ka khlaw, ong u Conrad
