Shillong: U symbud myntri rangbah ka jylla ba peit ia ka tnad PWD u bah Prestone Tynsong ula ong ba ka jingbuh pud ia ka jingjrong ki kali kiba hapoh 2.8 metre ban shah iaid na jingkieng Umiam, ka long ban iada na kano kano ka jingma kum ki Night Super Bos kiba la palat ia ka jingkhia 9 ton.
Haba jubab halor ka jingkylli kaba la wanrah u MLA ka Amlarem u bah Lahkmen Rymbui halor ka jingkhang iaid kali heh na jingkieng Umiam, u bah Prestone u la ong ba ka sorkar ka la pynjari ba tang ki kali kiba khia 9 ton bad kiba jrong tang hapoh 2.8 metre la shah ban iaid na jingkieng Umiam ban iada na ka jingtlor jongka.
Halor ka jingkylli u bah Renikton L Tongphar, u bah Prestone u la ong ba kito ki kali rit ruh kiba palat ka jingkit ia ka jingjrong kum u phlang, ki siej , ym shah ban iaid watla ki duna ka jingkhia hapoh 9 ton.
Ha kajuh ka por, u la ong ba ia ka DPR ban shna surok Four Lane na Umiam sha Shillong dang pynkhreh ka NHIDCL, khnang ban pyllait noh ban iaid ki kali na ka jingkieng Umiam.
U bah Prestone ula kubur ba ka jingbym lah ki kali heh ba kit marbam ban pynpoi sha Shillong na jingkieng Umiam, ka la ktah ia ka dor ka mur jong ki mar ki mata. U la ong ba na kane ka daw, ka sorkar ka la jan dep ban shna ia ka surok VIP kaba 23 km kaba pyniasoh na kad liengsuin Umroi sha Mawlai, bad shisien ba la dep kane ka surok yn lah ban iaid ki kali heh sha Shillong.
Ka don ruh ka surok na Mawdiangdiang sha Shillong watla ka kham jngai khyndiat ban poi sha sor.
Nalor ka jingkhia, ka jingjrong ruh pyrkhing ban iaid na jingkieng Umiam
