Shillong: U Myntri rangbah ka jylla u Conrad K Sangma ula pyntip hapoh ka iing dorbar mynta ka sngi ba ka sorkar ka la pyllut T.46.62 klur ha kine ki san snem ban pynkhie lung biang ia ki wah duid ha ka jylla.
Haba jubab shuh shuh halor ka jingkylli kaba la wanrah u MLA ka Mawryngkneng bah Heavingstone Kharpran, u Myntri Rangbah ula ong ba ia kane ka projek la pyntreikam ka tnad pynroi nongkyndong lyngba ka skhim 100 sngi ne NREGS. Ha kane ka skhim, la ker kynroh, thung dieng, shna pung, pynkhuid ia ki tyllong bad kiwei.
Ha kane ka projek, kumba 1601 tylli ki wah duid la pynkhie lung biang ha kine ki san snem. U Conrad ula pyntip ba ha ka jylla baroh kawei, ki don 70 hajar tylli ki wah duid bad na kine, 55,000 la pruid dak da ki tiar juk stad ban peitngor ia kine ban iada na ka jingshah pynjot. Lyngba ka Meghalayacm-springboard.in lah ban iohi ia ki wah duid kiba don kylleng ka jylla. U la pyntip ba kumba 792 tylli ki wah duid kiba la jan rngad noh bad na kane ka daw, ka tnad Soil and Water Conservation ka la shim ia ki lad ki lynti ban pynkhie im biang ia ki.
Ia kine ki wah duid la peit bad sumar da ki shnong ha ki shnong bapher bapher ha ka jylla.
Halor ka jingkylli ba kan ktah ne em ka projek ropeway ia ki tyllong um ha thain Lum Shyllong, u myntri Rangbah ula ong ba kam don namar ba la leh lyngba ka jingleh bniah da ka jingiadon bynta lang ki tnad sorkar bapher bapher naduh ka tnad Forest, Soil & Water Conservation bad ki agency nabar ri bad kam don eiei ka jingpom ia ki dieng.
U Myntri Rangbah u la ong ba ka jylla ka ioh pdiang slap 63 billion cubic man ka snem bad 30 million la tuid sha Bangladesh, 30 million eiei la tuid sha Assam bad kane ka dei na ka jingbym don ka lad ban pyllang, bad ka jingpynsuki ia ka jingtuid ka um. Kawei pat ka dei namar ba ka jingbym biang ka rukom sam ia ka um.
Ha ki san snem la pyllut 46.62 klur la pyllut ban pynkhie lung biang ia ki wah duh ha ka jylla
