Shillong: U nongialam liangpyrshah uba dei ruh u myntri rangbah barim u Dr. Mukul Sangma ula ong ba shwa ban thaw ia ka ain Meghalaya Residents and Safety Security Act (MRSSA) 2016, ka la twad jingtip na ka sorkar India halor ka jingdawa ia ka Inner Line Permit (ILP).
Haba kren mynta ka sngi, u Dr. Mukul u la ong ba ha ka jingtwad jingtip jong u na ki briew ka sorkar India, la sngewthuh ba ka long kaba jwat bha ban ioh ia ka ILP bad dei halor kane ka daw, ba ka sorkar katkum ka bor jongka, ka la wanrah noh da ka ain MRSSA.
U la ong ba ka jingwan rung beain ki briew nabar bad ka jingwan tuid kiba napoh ka ri, ka long ka mat kaba khia bha namar ba kan ktah ia ki trai shnong kumba jia ha Tripura. U la ong ba ka donkam ban iathir bha bad ki sengbhalang bad ki paidbah ban tehlakam ia kane ka jingwan tuid ki briew sha ka jylla.
Ka ILP ka dei kawei kaban tehlakam ia ka jingrung jingmih laitlan jong ki briew sha kane ka jylla hynrei ka donkam ban tip la ka long kaba lah ne em ban ioh ia ka ILP. Ha ka jingtwad jingtip jong u ha kato ka pork um u myntri rangbah ka jylla na ka sorkar India, ula ioh ia ka khubor ba ka long kaba jwat ban ioh ia ka ILP bad halor kane, ka sorkar jylla la thaw lad ban don kawei ka lad ban tehlakam ia ka jingwan rung ki briew bad dei halor kane ba ka sorkar ha ka por jong u, ka la thaw ia ka MRSSA.
U la ong ba ka jingrung beain ki briew ym tang hangne hynrei wat ha ki ri kiba khlain bor bad kiba stad tam ha pyrthei kum ha USA, England ki dang iakynduh ia kane ka jingeh.
Ba sngew jwat palat ban ioh ia ka ILP, ngi la wanrah da ka MRSSA: Dr. Mukul
