Shillong: U Lat ka jylla u C. H. Vijayashankar ula pynmih ia ka jingpynbna ba ka jingbam smai jong ki MDC ba dang shu shah jied thymmai jong ki district council kynthup ka KHADC bad ka JHADC kan long ha ka 27 tarik bad ka jingjied ia u Chairman bad u CEM kan long ha ka 28 tarik mynta u bnai Rymphang 2025.
Ia kane la pyntip da u Commissioner & Secretary ka Tnad DCA Bah Cyril Diengdoh uba iathuh ba ka jingpyntian smai ia ki MDC kan long ha ka por 11 baje mynstep.
Ha ka sngi kaba bud, yn pynlong ia ka elekshon ban jied ia u Chairman ka Iingdorbar, ka ban long ha ka por 11 baje mynstep bad hadien yn pynbud da ka elekshon ban jied ia u Chief Executive Member (CEM), ka ban sdang ha ka por 2 baje nohphai sngi.
U Lat ka Jylla ula thung ia ka Deputy Commissioner ka East Khasi Hills bad West Jaintia Hills ban pyniaid ia kine ki dorbar jong ka Council bad ban pynbam smai ia ki MDC ba thymmai kat kum ka rule 24 jong ka Assam & Meghalaya Autonomous District (Constitution of District Council ) Rules 1951.
Yn bam smai shwa ki MDC shwa ban jied Chairman bad CEM ha KHADC
