PIB Shillong: Ka Inter-State Youth Exchange Programme kaba san sngi kaba pynlong da ka Nehru Yuva Kendra Shillong bad kaba la wan iashim bynta ka kynhun na Mizoram ka la kut noh mynta ka sngi ha Youth Hostel Shillong. Kane ka prokram kaba la sdang naduh ka 16 tarik u Rymphang ka la don ki bynta kiba iadei bad ka yoga, ka jingioh jinghikai shaphang ka ktien, ka jingiasam ia ka deiriti lyngba ka jingleit jngoh ia ki jaka ba kongsan ha ka histori bad ki jingpyni ia ka deiriti kaba la ai shibun kiei kiei ia ki nongiashim bynta.
Ha ka sngi pynkut, u Sibhi Chakravarthy, Director ka tnad Community and Rural Development, jong ka Sorkar Meghalaya u la wan iashim bynta kum u kongsan. Ha ka jingai jingkren, u la iaroh ia ka NYKS kaba la pynlong ia kum kine ki prokram, bad u la ong ba kine ki plie ia ki lad ia ki samla ban sngewthuh ia ka deititi bad ka rukom im jong kiwei kiwei ki jaitbynriew. U la ban jur halor ka jingiatylli wat hapdeng ki jingiapher bad ka jingkongsan jong kum kine ki prokram ban wanrah ia ka jingsngewthuh kaba kham jylliew hapdeng ki jaitbynriew bapher bapher ha kylleng ka India kaba pynkhlain ia kane ka jingiatylli. U la pynshlur ruh ia ki samla ba kin wad lad dalade bad shim ia ki lad ba ki ioh lyngba kine ki jait prokram ba kin sngewthuh kham bha ia ki jingiapher bad ki jingiahap hapdeng ki jylla.
Kane ka prokram ka la wanrah lang ia ki samla na ki longiing bapher bapher, kaba la kyntiew ia ka jingburom iwei ia iwei bad ka jingsngewthuh ia ka deiriti bad kaba iarap bha ia ka jingiatylli ha ka ri.
Kut noh ka Inter-State Youth Exchange Programme kaba san sngi ha Shillong
