Shillong: U President ka National People’s Party (NPP), Bah Prestone Tynsong u la ong ba ka jingshah kynnoh ka NPP ym sngewthuh sngewthaw shuh, kata ka bamsap, ka tuh ka thiem, hynrei ym don uwei ruh uba leit ujor da ka ejahar halor kita ki jingkynnoh, pynban ki mareh leit ujor ejahar tang ïa kaba kren ha social media ka bym don jingmut eiei ruh em, kaba dei tang ka jingpynlut kai ïa ka por namar kim lah ban pyndonkam lut ïa ka por.
Haba kren ha ka jingïalang pan jingkyrshan na ka bynta u kyrtong ka NPP na Mawphlang-Diengïei ha Mawngap, u Nongïalam ka NPP uba dei ruh u Symbud Myntri Rangbah ka Jylla, u la ong ba ka Sorkar India ka don ïa ki tnat treikam laitluid kum ka CAG kiba peitngor lada don ka jingpyndonkam kulmar ïa ka pisa paidbah. Ha kaba u la kyntu ïa ki paidbah ba kim dei ban ngeit biej ïa ki jingkren jong kito ki briew kiba shu lapmiet ban kynnoh ïa kiwei, kim tip ïalade ki don haei.
Na ka liang u Bah Prestone u la kyrpad ïa ki paidbah kane ka konstitwensi ba kyrshan pura ïa u Bah Lamphrang Blah namar ka NPP ka buh hakhmat eh na ka bynta ban wanrah ïa ki kam pynroi bad ka ïoh ka kot ha man la ki konstitwensi.
Ka jingshah kynthoh ka NPP ym sngewthuh sngewthaw shuh: Prestone
