Shillong: Ka National Career Service Centre for Differently Abled (NCSC-DA), hapoh ka Directorate General of Employment (DGE), Tnad Labour & Employment, Sorkar India, Shillong hynnin ka sngi ka la pynlong ia ka Job Fair ba kyrpang ia ki briew kiba don jingduna ha ki dkhot met.
Ia kane ka sienjam la pynlong ha ka jingiatreilang bad ka American India Foundation, kaba thmu ban kyntiew ia ka jingpynkupbor ha ka ioh ka kot bad pyniasoh ia ki briew kiba don jingduna ha ki dkhot met bad ka kam.
Baroh ki don 79 ngut ki kandidet kiba don jingduna ha ka jinglah pynkhih ia ki bynta jong ka met, ka bor kren bad bor iohsngew, bad ka bor iohi ki la iashim bynta ha kane ka fair. Hynniew tylli ki kompani – Reliance Retail, Domino’s Pizza, Compass Group, Teleperformance, Employment Express, bad Anamata Outsourcing Pvt Ltd- ki la tyrwa ia ki kam kum Delivery Associate, HR Recruiter, Customer Support, bad kiwei kiwei. Napdeng ki 79 ngut ki kandidet, 41 ngut ki la shah jied ban ioh kam.
Ia kane ka prokram la plie da ki nongshah khot sngewbha ba pawkhmat, ba kynthup u Bah J.P. Lakiang, Director, Directorate of Employment, Sorkar Meghalaya, uba la iashim bynta kum u Kongsan.
U Ram Shakal Sahani, Director, Composite Regional Centre (CRC), Shillong, uba la iashim bynta kum u Symbud Kongsan. U Jaydip Mukherjee, Project Lead, MSRLMS, Sorkar Meghalaya, u Sujit Kumar Sahoo, ADE & SREO, NCSC-DA, bad ka Revati Vishwanathan, Project Lead Manager, American India Foundation, ki la iadonlang ha kane ka prokram, lem bad kiwei kiwei ki kynrem ki lyndan na ki ophis bapher bapher ha Shillong.
La pynlong ia ka Jop Fair ba kyrpang ia ki briew kiba don jingduna ha ki dkhot met ha nongbah Shillong
