Shillong: U myntri rangbah ka jylla u Conrad K Sangma ula ong ba kito kiba la ioh license na ka sorkar India, ki la lah ban sdang noh ia ka jingtih dewiong mynta ne lashai, katkum ka jingkloi jongki, ban pynbiang ia ki jingdonkam.
Haba kren mynta ka sngi, u Conrad u la ong ba kane ka jingioh lad ban tih dewiong biang, ka long hadien ka jingiakhun kaba la slem bha ha ka kashari Supreme Court ka ri India.
Ki don lai ngut kiba la ioh license ban tih dewiong katkum ka jingstad saian ha kane ka jylla.
U Conrad ula pynthikna ba ka Sorkar Jylla ryngkat ka Ministry of Coal, kila pynioh ia ka jingbit ban tih dewiong da ka jingstad saian ha Jylla. Kum shibynta na kane ka rai, ka Controller of Coal, ka Sorkar India bad ki trai ban tih par ha Jylla, kila iasoi ia lai tylli ki soskular Escrow ba kin sdang tih noh ia u dewiong ha ki lai tylli ki jaka ba kynthup ia ka Pyndengshalang, West Khasi Hills, Saryngkham, East Jaintia Hills, bad ka Lumiakhi-Wahsarang, East Jaintia Hills.
U Conrad ula pynpaw ruh ba nalor kine ki lai tylli ki project, sa 12 tylli ki aplikeshon kila don ha ka jingbishar ban ai ia ka jingmynjur. Ka Sorkar Jylla ha ryngkat bad ka Tnad Mining & Geology, kala trei khlem shongthait ban pynsted ia kane ka kam.
La lah ban sdang tih dewiong mynta ne lashai katba kloi kiba ioh license: Conrad
