Shillong: U Kyrtong jong ka Khun Hynniewtrep National Awakening Movement (KHNAM) u Bah Peter Challam ha ka 28 Tarik u kyllalynkot 2025 u la wan ban thep kyrteng ia ka lade na bynta ban ia khun ka election MDC sha KHADC ka ban sa long ha ka 21 tarik u Rymphang na 17-Laitumkhrah-Malki.
Hadien ba lah dep kyrteng U Bah Challam haba kren bad ki lad pathai khubor, ula ong ba ka jingmih jong u ban ia khun ia ka election MDC kadei halor ki jingeh ki paidbah ka thaiñ nongkyndong bad ka jinghiar ka ioh ka kot jong ki na ka daw ka jingduh noh ia ki jaka ki puta, bad ka jingktah na ki jingkhlong ia ki Marpoh khyndew, namar ba ka district council, ka dei kaba peit ia kita, khnang ban lah ban pynneh ia ki khlaw ki btap, ban nym duh ia ki umbam umdih.
U Bah Peter Challam udei u Kyrtong uba la ia khun ia ka election MP kum u Kyrtong khlem seng ne Kyrtong Shimet Hynrei u khalm la poi sha ka jingjop.
U la ong ba un pynkhih ruh ia ka Village Administration Bill (VAB) kaba sahteng haduh kine ki sngi, bad kumjuh u don ka thong ban pynbeit ia ka rukom synshar ha ki shnong ki thaw, khamtam ha kaba iadei bad ka iadie iathied khyndew.
U bah Peter u la ong ba ha ka elekshon ym long ban khein sting, wat u MLA ne u MDC um lah ban khein sting ha ka elekshon namar ba ka rai ka dei jong u paidbah.
Halor ka jingthaw ain ka sorkar jylla ban buh ia ka Land Bank ne ka jaka pyllang jaka ban thied na ki riew shimet, u bah Peter um iahap satia ia kane namar ba kan pynjot pynpra ia ka jaitbynriew bad ka district council ka dei ban leh da kaba tyngeh ia kane, namar ba lada ki nongshong shnong kim don jaka haduh 76 percent, kata ka mut ba ka la shah khnoit bym lah shuh ban mutdur.
Yn buddien ia ka VAB, ban iada ia ka khyndew bad pynbeit ia ki rukom synshar shnong, mih u bah Peter na Malki-Nongthymmai
