Shillong: Ka Meghalaya ka la lah ba kan kamai 198 ron ha ka sngi kaba nyngkong jong ka jingiakhun pyrshah ia ka Odisha haka lympung ialehkai jong ka Ranji Trophy Trophy 2024-25 Elite Group A ba long ha madan ialehkai kriket ka MCA.
Ka jingkhyllem noh ki batsman jong ka Meghalaya ka la wan hadien ba u Tapas Kumar Das marwei u la ioh ban khur haduh 6 wiket,kabala wan hadien ba ka Meghalaya kaba la jop ia ka jingkynting pisa, ka la kam trai ba kan tied nyngkong.
Haduh ba kut ka sngi ba nyngkong, ka Odisha ka la lah ba kan kamai 70 ron khlem pat hap wat tang uwei ruh u wiket.
Lada pynshong nongrim ia ka jinglong jingman ka suin bneng, lah ban ong ba ka jingiakhun ka kham plie lad bha ia ki nongkawang bol, khamtam lei lei ha ka por mynstep, kaba hangne la shem bad iohi ba ki batsman ka Meghalaya ki la out noh hadien ba ki la pynpaw ia ka jinglong ba skhem bha ka rukom ialehkai ka jong ki.
Pynban ka jingkyrkieh bad shongshit, ka kylla long ka liew lep ia ki kato katne ki batsman jong ka Meghalaya, kum ka nuksa u Bamanbha Shangpliang u la lah ban kamai 14 ron ba la wan na ki 23 tylli ki bol, ha kaba la don ruh ka khyllipmat ba u la lah ban khalah marbud sha boundary, hynrei ha ka bol kaba bud u la out noh.
U Nishanta Chakraborty, u la lait ler shwa shipor kaba la wan hadien ba un lah ban kamai 27 ron na ki 70 tylli ki bol, hadien kane ki arngut ki guest professionals player u Ajay Duhan bad Anirudh B ki la lah lem ban ia kynjoh sha ki ar dak jingkhein ban kamai ron hadien ba ki kamai 15 bad 12 ron.
Pynban shu san kynsan ka Meghlaya ka la shem ialade hadien ba ka la lap ba hap noh 5 wiket bad ban kamai tang 75 ron, hynrei shwa ba ki rang kawang bol ka Odisha kin bteng ban thom shakhmat, bluit wan ban mih madan ka 40 ron na ki 54 tylli ki bol na u Sumit Kumar bad ka 43 ron na ki 61 tylli ki bol na u Jaskirat Singh Sachdeva, kaba pynlong ia kine arngut ban sei madan ia ka jingkamai ron paralok kaba 65 ron naka bynta ka wiket kaba hynriew.
Hadien kane u Wanlambok Nongkhlaw, uwei na ki samla ialehkai ba la paw bad ba ialehkai ruh ha ka lympung jong ka Syed Mushtaq Ali Trophy T20, u la lah ban wanphai biang sha kane ka jylla jong ka jingiakhun hadien ki lai snem, ha kaba u la lah ban kamai 15 ron ba la wan na ki 29 tylli ki bol.
Kumta ha kaba kut, sa shisien ka Meghalaya tden kan sahkut ia ka jingkamai hapoh ka 200.
Haba wan ban sdang ia la ka pali tied ba nyngkong, u Swastik Samal bad u Shantanu Mishra ki la lah ban ia kamai mar 44 bad 23 ron, bad iai bteng ban neh hapdeng ka madan iakhun.
Kamai ka Meghalaya 198 ron pyrshah ia ka Odisha ha ka Ranji Trophy Trophy 2024-25 Elite Group A
