Shillong: Ka Confederation of Ri Bhoi People (CoRP) 20 Mer Circle ha ka sngi Balang ka la plie ia ka jingkieng iaid kjat ha shnong Umdap bad ka la sam ia ki jainkup syaid (Blacket) sha ki longiing baduk kum shibynta ka jingrakhe lehkmen ia ka sngi Khristmas mynta u snem 2024.
Ka seng la sam khusnam ruh ia ki khynnah RCLP&UP skul kiba wan shakhmat ha ki jingpule kum shibynta ban ai mynsiem bad pynshlur ba kin nangiai trei shitom ha ki jingpule ha ki snem ban wan.
Kumjuh ka la pynkup burom ruh ia uwei u rangbah bah Cleophas Thre Nongrum uba la pass nyngkong ia ka matrik na ka shnong Umdap ha u snem 1984 na St. Paul Skul Nongpoh. U bah Thre ula long ruh u nongialam shnong ba don bynta kikam treimon sngewbha ban kyntiew ia ka shnong bad ka thain Umdap, Ri Bhoi District.
Katba ia ka jingkieng iaid kjat la plie na bynta ban pynsuk ia ki paidbah ban leit ban wan hapdeng ka Umdap Rngi bad Umdap Dumu, la iathuh ki paidbah ha ki snem ba la dep ki mad ia ka jingeh ban leit ban wan bad teng teng ki sahkut ha shiliang ha ka por slap ba heh ka um.
Ha kane ka sngi, u bah Lawrence Nongrum uba long u kyrteng MDC ka Congress na Nongpoh Constitwency ula long u kongsan bad u Bah Bandari Ryntathiang President ka CoRP Sengkmie u symbud kongsan kiba la ai jingkren kyntu kynpham ia ki khynnah skul ban nangtrei shitom ha ki jingpule.
Ia ka jingialang la pyniaid da u President ka CoRP 20Mer Circle, bah G Kres ha ka jingdonlang ar ngut ki rangbah shnong u bah Alexander Maring Umdap Rngi bad u bah Anjelius Maring rangbah shnong Umdap Dumu, u babu Beda Maring bad ki dkhot ka CoRP central body.