Shillong: U symbud myntri rangbah u bah Prestone Tynsong uba peit ia ka tnad District Council Affairs ula iaroh ia ka samoi jong ka KHADC 2019-2024.
Ula kren ia kane ha ka jingialang ha jingpyllait ia ka Research Project Research Committee jong ka KHADC mynta ka sngi ha State Convention Centre, Shillong.
U bah Prestone ula ong ba ka samoi ka KHADC naduh 2019, ka dei kaba la leh ia ki kam bah kam san, kiba la wanrah ia ki jingkylla kaba bun hapdeng ka jingkylla ki CEM na por sha ka por ha kine ki 6 snem.
Ula ong ba ka sorkar ka peit ia ki khmat sha ki 3 tylli ki ADC, namar ba dei ka District Council kaba ai ka jingiada ia ka jylla ia Khasi, Jaiñtia bad Garo.
Ban pynsted ia ki Bill ban ioh ia ka jingmynjur u Lat, ka sorkar kala thaw ia ka Standing Committee ha kaba ka don ka jingiasyllok ki district counci bad ka sorkar jylla shwa ba kin thaw ia ki ain bad hadien ba la thaw kila phah sha u Lat.
Ula ong ba don kiba ong ba ka sorkar ka knieh ia ki bor ki district council, kata ka dei kaba bakla, hynrei ka sorkar ka kwah ban pynkhlain ia ki district council, bad kata ka shong ha ki MDC.
Ha kajuh ka por, u symbud myntri rangbah ula pynkynmaw ba ha ka por ba wanrah ka sorkar pdeng ia ka Citizenship Amendment Bill (CAB), kila ia leit na North East ban pyrshah ia ka CAB.
Ula ong ba hadien ba la rung na Meghalaya ha kamra u myntri ka tnad kam pohïing ka ri, u Amit Shah, ula ai tang kawei ka jubab, la ioh tang shi lain na u Amit Shah bad kata ka long ba ka Citizenship Amendment Act kan ym treikam ha Meghalaya ba don ka Sixth Schedule.
U bah Prestone ula ong ba kane ka dei ka jingdonkam ka Sixth Schedule namar ba don kiba ong ba hana ka Sixth Schedule kam long, kam donkam, kito kiba sngewthuh bakla, sngewbha ngam kham jylliew ban sngewthuh ia ka dor bad ka bor ka Sixth Schedule.
Iaroh bad put turoi u bah Prestone ia ka samoi ki MDC 2019-2024
