Shillong: Ka Shillong Lajong FC ka la pylliem kput ia ka Rajasthan United da 8-0 ha ka jingiakhun mynta ka sngi ha SSA Stadium, Shillong jong ka lympung I-League.
Ia kine ki kol la thep da u Douglas Rosa Tardin ar tylli ha ka 17 minit bad 51 minit, u Figo Syndai ha ka 3 minit, u Daniel Goncalves 45+3 minit, Damaitphang Lyngdoh 49 minit, Marcos Rudwere Genar E Silva ha 61 minit, Imanol Arana Sadaba ha 66 minit bad u Hardy Cliff Nongbri ha 87 minit.
Kane ka jingjop ka la pynshongshit ia ki kyrshan ka Shillong Lajong kiba la mad ia ka jingshah rem bad ka jingiakhaid.
Ka Shillong Lajong FC ka la kiew sha ka kyrdan ba 6 ha ka miej kamai point ha ka I-League haduh mynta.
Ka jingialehkai kaba bud ha la iing ia ka Lajong kan long ha ka 14 tarik mynta u bnai pyrshah ia ka Gokulam Kerala por 4:30 pm ha SSA Stadium.