Shillong: Ka MLA ka NPP ka kong Ampareen Lyngdoh ka la ong ba kam dei ka pandit ne ka nongiathuh lypa ia ka kam elekshon hynrei kaba kongsan ka shong ha u nongialehkai.
Haba kren halor ka jingpynkhreh ia ka elekshon MDC kaban sa wan, ka kong Ampareen ka la ong ba ha ka elekshon ka shong ha u nongialehkai lada u lah ban lehkai bha, ym don daw ba ki paidbah kin kyntait.
Ha ka politik ki don ki jingkynthoh, jingkynnoh hynrei kane ka dei ka juk politik kaba thymmai, ki rangialeh ki dei ban trei. Hynrei ha kajuh ka por, ka la ong ba kaba sngew bynniaw ka long ba ki briew ha ka elekshon 2023, ki briew kim khein snep shuh ia kaei kaba la synniang bad kila shah pynshad ha ka jingsngew jongki. Ka la ong ba ka kyrmen ba ki paidbah kin sngewthuh ia ka jingnoh synniang ym ban shu leh shongshit.
Ka la ong ba ka politik ha India ka dei ka bym lah ban tip lypa bad kum ka nongialam ka NPP ka la shem ba u myntri rangbah ba mynta u dei uba sngewrit tam ha kaba u lah ban iakren bad ki briew hangno hangno ruh. Ka sorkar kaba ialam ka NPP ka la leh ia kiba bun ki kam bah ha ka jylla kiba la sahteng bun phew snem, bad kiba dang thymmai ruh. Ka NPP ka ieng na bynta ki paidbah ka jylla ka thain shatei lammihngi ban pynsngew sha ka ri India.
Ngam dei u pandit ban iathuh lypa, ha ka politik ka shong ha u player: Ampereen
