Shillong: Ki nongkyrshan jong ka NPP Malki-Laitumkhrah constituency ha ka sngi ka 04 u Nohprah 2024, da kawei ka sur ki la rai ban ai biang ka jingkyrshan ba pura ia u Bah Fantin J. Lakadong u ba long u MDC ba mynta, ban long biang kum u kyrtong sha ka election jong ka ing dorbar thawain ka KHADC ha u snem ban wan u 2025.
Ia kane ka rai la shim ha ka jingialang kaba la long ha ka iing sah ka MLA bad ruh ka Myntri ka sorkar jylla ka Dr. M. Ampreen Lyngdoh, kaba la wan ban iashim bynta da palat spah ngut ki nongkyrshan na ki shnong ki dong ki thain baroh ki ba hap ha kane ka Constituency.
Haba kren ha ka jingialang u bah Fantin u la pynpaw ia ka jingsngewnguh ia ki paidbah ki ba ai ka jingshaniah ia u hapdeng kine ki 6 snem, kum u nongialam. U la pynsgew ba wat hapdeng ki jingpynthame bad ka khubor hamsaia hynrei ki nongshong shnong ka constituency bad wat sha kiwei ki jaka ki shaniah ha ka nongrim ba skhem ka party NPP.
U la bynrap ba kiwei ki iohlad ban kynthoh ia u namar u dei u briew u bym da bun ktien ne put turoi lyngba ki social media, hynrei ki kam na sha lyndet u pyndep kum u nongmihkhmat, kaba pynlong ia ki nongkyrshan ban ia mynjur biang iaka kyrteng jong u.
La ioh ruh ka jingkren na u bah Embhah Syiemlieh, ka Dr. Ampareen kaba pynsngew ba ia ka kyrteng u bah Fantin la dep ban phah sha ka NPP Shillong city.
Kumba long mynta na ka 17- Malki-Laitumkhrah MDC constituency ka jingiakhun ki kyrtong ki ba la paw kyrteng ki long ka kong Deity Majaw na ka VPP, katba kiwei ki seng sain pyrthei kim pat pynbna.
Ngam da bun ktien ne put turoi, ki kam ki iaid: Fantin
