Nongpoh: Ha ka jingleit jngoh kaba kongsan sha Ri Bhoi District, Meghalaya, Ka Annapurna Devi, ka Myntri ba donburom jong ka Sorkar Pdeng kaba peit na ka bynta ki lad pynkiew ïa ki kynthei bad ki khynnah, ka la ïakren bad ki briew kiba iadon bynta bad ki dkhot ka imlang sahlang ha ka 30 tarik u Naiwieng. Ka la pynpaw pyrthei ïa ki jingthmu jong ka Tnad ka koit ka khiah jong ki kmie bad ki khynnah bad ka jingsdang ia ki lad pynroi ïa ki khynnah rit. Ha ka jingleit jngoh jong ka, ka Myntri ka la sngap ia ki jingud jingnam jong ki paidbah, bad ia ki jingdawa na ka bynta ban peit biang ia ki jingbam ne ki Take Home Rations (THR) da ka Supplementary Nutrition Programme (SNP)-ICDS.
Ïa ka Myntri ka Sorkar Pdeng la synran lang da u Development Commissioner & Principal Secretary u Sampath Kumar, IAS; U Pravin Bakshi IAS, u Commissioner & Secretary jong ka tnad Social Welfare U Ramakrishna Chitturi, Ka Joint Secretary ka tnat Social Welfare C.D Lyngwa, Director ka Social Welfare, U Deputy Commissioner Ribhoi U Abhilash Baranwal, u BDO- Eric Kevin Dkhar, bad ki heh ophisar na ki tnad treikam jong ka district bad kiwei pat ki tnad treikam kiba kynthup ia ka tnad ka koit ka khiah bad ka Meghalaya State Rural Livelihoods Mission (MSRLS).
Ka Myntri sorkar ka la iakren ruh bad ki nongsumar bad ki dkhot jong ka SHG kaba don ha ka shnong Saiden kiba la pynpaw ïa ka jingdonkam kyrkieh ban pynbeit bad pynthymmai ïa ka rukom ai jingbam (ration) ban rah sha ïing kaba hapoh ka ICDS-SNP. Ki la kdew ïa ka jingbym don ki lad ai jingbam ba la shna kyrpang na ka bynta ka thaiñ bad ka jingduna ka rukom pynbiang ha ki katto katne ki jaka. Ki dkhot ka SHG ki la pynksan ruh ia ka jingdonkam ban pyniasoh lang ia ki jingbam bad ka kolshor jong ka thain ban pynthikna ia ka jingioh ia ka jingbam ba tei na ka bynta ki khynnah bad ki longkmie kiba armet.
Haba sngap bad kubur ia ki jingeh jong ki, na ka liang ka Myntri Sorkar Pdeng ka la pynthikna da kaba ong ba “Nga la ïohsngew ïa ki sur jong phi bad ngan buddien ia kane ka kam ban pynthikna ba ki THR hapoh ka SNP-ICDS kin dei kiba la pynlong kyrpang hapoh ka thain bad ba yn kynthup ruh ia ki shnong ki bym pat shah kynthup.”
Ha ka jingleit jngoh jong ka ïa ka Primary Health Centre ha ka Byrnihat bad ka jaka sumar jong Chief Minister’s Safe Motherhood Scheme (CM-SMS) Transit Home, na ka liang ka Myntri ka la ïaroh ïa ka Early Childhood Development Mission jong ka jylla Meghalaya bad ka CM-SMS na ka bynta ka jinglah ban pynkylla dur ïa kiei kiei kiba donkam. Na ka liang ki opisar sorkar ki la pynpaw da kaba ong ba ka CM-SMS ka la pynduna ïa ka jingïap jong ki longkmie haduh 50% ha ki saw snem.
Haba ïaroh ïa kine ki jingsdang, ka Myntri jong ka Sorkar Pdeng ka la batai ïa ka thong jong ka ECD Mission kum ka nuksa kaba lah ban pynheh bad pyniar na ka bynta ka ri India baroh kawei. Ka jingpyni ia ki jait jingialehkai ba pynproh bad pynwandur ia ka jabieng ka pyni ia ka thong kaba thymmai na ka bynta ka jingpynroi ne pynkiew ia ki khynnah.
Ka Myntri Sorkar Pdeng ka la ïakren ruh bad ki dkhot jong ka SHG, da kaba ai khublei ïa ka jingpyrshang jong ki ban thaw ïa ki lad kamai jakpoh na ka bynta ki kynthei. “Lyngba ki SHG, ki kynthei ki shem ia ki lad ki lynti ban kyntiew ïalade bad ïa ka ïing ka sem jong ki. Ka Sorkar India ka shimkhia ban kyrshan ïa kum kine ki jait jingthmu na ka bynta ban pynkupbor ïa ki kynthei bad ban pynkhlain ïa ki shnong ki thaw,” la bynrap ka Annapurna Devi.
Ka jingialang na ka bynta ban peit bishar bniah jong ki distrik kaba la pynlong ha ka ophis jong u Deputy Commissioner ka District ka la pynpaw ia ki jingeh bad ki buit treikam kiba dang iaid shakhmat ha ka roi ka par. Na ka liang Myntri ka la pynpaw biang ia ka jingkular jong ka ban buddien ia ki jingtyrwa ba la wanrah da ka jylla, kaba kynthup naduh ban pynbha ia ki jingkwah jong ka ICDS-SNP bad ban pynthikna ba baroh ki nongioh jingmyntoi kin ioh ia ki jingshakri kiba bha.
Haba pynkut ia ka jingleit jngoh, na ka liang ka Myntri Sorkar Pdeng ka la pynpaw ia ka jingdonkam jong ka jingiadonbynta ki paidbah bad ka jingiatreilang hapdeng ki tnad treikam na ka bynta ban wanrah ia ka jingkiew shaphrang. “Ka jingpyrshang jong ka jylla Meghalaya ka long ka nongrim na ka bynta ka Ri India. Ngi dei ban ïatreilang ban pynthikna ban ym don ki khun ne ka kmie kiba sahdien,” la ban jur ka Myntri.
Kane ka jingleit jngoh ka la pynskhem biang ïa ka jingkular bad kut jingmut jong ka sorkar ban pynbeit ïa ki jingdonkam jong ki briew ha ka thaiñ katba da kaba pyni ïa ki rukom kiba thymmai jong ka Meghalaya kiba long kum ki nongmuna kiba lah ban long na ka bynta ka jingkiew shaphrang jong ka ri.
Wan iuh kjat ka Myntri ka Sorkar Pdeng ha Nongpoh nhalor ka jingdawa ki paidbah ban pynthymmai ïa u khaw reshon
