Shillong: Ki nonghikai ka skulbah NEHU kila pdiang sngewbha ia ka rai jong ki samla pule ka skulbah NEHU ban leit phai biang sha kamra klas hadien shi bnai eiei ba kila pyllong ia ka jingiakhih pyrshah ia u Vice Chancellor u Pro. Prabha Shukla Shankar.
Haba kren mynta ka sngi, u President ka NEHUTA u Prof. Lakhon Kma ula ong ba ki nonghikai ki pdiang sngewbha ia ka jingrai ki samla pule ban leit phai sha ki kamra klas hadien ka jingiakhih. U la ong ba kin sa pynbeit ia kaei kaba kila duh ha kine ki sngi, kin sa pynwandur ban buria.
U la ong ba ki nonghikai ki kyrshan ruh ia ka rai ki samla pule ban pyllong ia ka jingiakhih hadien ba la mih na ka klas hapdeng 3-5 baje janmiet shi bynta ban pyni ia ka jingbym hun ia ka jingiai don sah u Prof. Shukla kum u VC namar ba haduh mynta u shu shim tang ka shuti khlem pat shah weng.
Kmen ki nonghikai ba rai wan phai shong klas biang ki samla NEHU
