Shillong: Ka sorkar jylla ka la mynjur ia ka Meghalaya Health Academic Rules 2024 ban pynthikna ban pyntreikam ia ki medical college ha ka por kaba la buh.
Haba kren sha ki lad pathai khubor hadien ba la wai ka jingialang kynhun myntri, ka myntri ka tnad ka koit ka khiah ka kong Ampareen Lyngdoh ka la ong ba la wanrah ia kane ka Services rule ban thung ia ki nonghikai ha ka Shillong Medical College bad ka sorkar ka la buh thong ban sdang ia ka jingpule doctor ha u snem 2025-26. Ka jingmang pisa na ka bynta kane kan long kumba T.60 klur eiei ha ka shi snem.
Ka kong Ampareen ka la ong ba ka sorkar ka la don lypa ki doctor kiban long ki nonghikai kiba na ki hospital ka sorkar ban hikai ha kane ka Shillong Medical College nalor kiwei.
Lyngba kane ka rai ka kynhun myntri, ka sorkar kan iaid shakhmat ban pyntreikam ia ka Shillong Medical College kloi katba lah.
Lah ban kdew ba ka sorkar ka la pynkhreh ia ka Shillong Civil Hospital bad ka Ganesh Das Hospital kum ka jaka pule doctor, jong ka Shillong Medical College.
Ka la ong ba ka sorkar ka la pynbha ia ki tiar ki tar bad kiwei ki jingdonkam bad ha ka snem ba nyngkong, yn pdiang 100 ngut kiban pule doctor.
Ha kaba iadei bad ka Tura Medical College, ka sorkar ka dang pynkhreh ban sdang kumba leh ia ka Shillong Medical College watla ka lah ban kham shim por.
Ka sorkar ka la mynjur ruh ia ka Meghalaya Dental Health Service Rule 2024 ka bym pat don haduh mynta.
Kane ka kan long na bynta ban thungkam, ban pynsted ia ki kam kyntiew kyrdan, bad kiwei kiba iadei bad ka jingsumar bniat.
Yn sdang 100 ngut ban pule doctor ha 2025-26 ha Shillong Medical College: Ampareen
