Shillong: Ka seng Hynñiewtrep Youths’ Council – Central Executive Council (HYC-CEC), ka pynpaw ia ka jingsngewkhia halor ki jingmih khubor ia ki jingjia kiba lah jia ha ki jaka Sumar kiba don hapoh Assam kiba ka Seng ka ju phah ia ki Khynnah bad Rangbah ban shah sumar ia ka jingpang kyrni droks. Ngi sngewsih ruh ban iohi ia ki khubor lamler kiba lah pynsaphriang lyngba ki rynsan social media khamtam eh kibaka jingthmu ka jong ki ka long ban pynbudnam bad pynthohbria ia ka Seng hi baroh kawei.
Ha kaba nyngkong eh, ngi sngewpyrshah jur ia ka jingkynnoh bad mih khubor ba ka don ka jingkem bad phah jubor jong ka Seng ia ki briew kiba ngi ioh bat khlem da pyntip jong ki bahaing hasem. Kane ka long kaei kaei ka bym shisha namar ka Seng hi naduh ba ngi sdang ban shim ia kane ka Jingiakhun ka jong ngi pyrshah ia u Droks ha kaba ngi ioh ban bat ia ki briew kiba lah kyrni ha kane ka kam, nyngkong eh ngi iakren bad ki bad kumjuh ruh ban khot ia kren ia ki kmie ki kpa ne ki bahaing hasem ki jong ki bad lyngba ka jingia sngewthuh jingmut bad ki bahaing hasem bad da ka jingai bor ka jong ki, ngi sa iarap ban iakren pat bad ki jaka sumar na ka bynta ban phah ia kiba kum kine ki briew sha ki jaka sumar. Bunsien ruh dei ki bahaing hasem kiba ju wan ban iakynduh ia ki Nongialam ka Seng ban pan jingiarap ban phah ia ki khun ki kti ne ki bahaing hasem ki jong ki sha kine ki jaka sumar. Kumta, shuwa ban phah sha kine ki jaka sumar ki kmie ki kpa ne ki bahaing hasem ki hap ban da soi ia ka kot ne ka phom ban phah sumar ia kiba kum kitei ki briew ki ba donkam ka jingsumar. Haduh mynta, ngim pat ju phah ia uno uno u briew khlem ka jingaibor ne soi kot jong ki bahaing hasem. Kumta, ka jingkynnoh ba ngi phah da ka bor ia ki briew khlem ka jingtip jong ki bahaing ha sem ka long kaei kaei kaba ialam bakla bad kaba lamler suda namar ia baroh kiba ngi phah lyngba ka jingiarap jong ka Seng kidei kiba ngi don ia ki kot ba lah soi da ki bahaing hasem ki jong ki. Ki don shibun ki samla, ki rangbah kiba lah kyrni ha u droks kiba thiah ha ki iew ki hat, ki bym tip shuh ia ka ing ka sem ne kiba ki bahaing hasem kim treh shuh ban wan shakhmat, ia kiba kum kita ngim lah ban iarap watla ki kwah eh ruh namar ba ngim ioh ia ka jingaibor na ki bahaing hasem.
Kaba ar, ka don ka jingkynnoh ba ka Seng ka don ka jingiadei ne ka ia suhbuit bad ki Nongpyniaid ia kitei ki jaka sumar da kaba ka kem ia ki Nongdie bad Nongdih bad phah pat ia ki sha kitei ki jaka sumar. Ha kaba iadei bad katei ka jingkynnoh, ngi kwah ban ong ba kum ka Seng, ha shuwa ban phah ia ki samla ne Rangbah sha kine ki jaka sumar, ngi lah ju leit ruh ban peit ia kitei ki jaka, ban iakynduh ia ki samla kiba pyniaid ia kitei ki jaka sumar bad kumjuh ruh ia ki Nongshah sumar. Ha ka jingleit ka jong ngi, ngi lap ba bun hi kiba shah sumar bad kiba peit ia kine ki jaka sumar kidei hi kid oh ki snam ki jong ngi bad ha ka jingiakren bad kiba shah sumar ym shym lahdon kano kano ka jingong ne batai ba ki don kita ki jingleh bein ne jing bymbiang ka bam ka dih, ka sum ka slem ne ka ai dawai dashi. Kumta, kum ka Seng ngi sngewshngain ban phah ia ki khun samla bad ki rangbah ha kine ki jaka sumar namar ba ki ia don ki pardoh parasnam ki jong ngi kiba peit bad kumjuh ruh kiba shah sumar. Kam don ei eie kaba kum kata kaba lah kynnoh ia ngi ba ngi ia don jingiadei bad kita kiba pyniaid ia kine ki jaka sumar hynrei kadei beit namar ba ngi sngew shngain, ngi sngew shaniah ia ki briew lajong ha kine ki jaka sumar.
Kaba Lai, ha kaba iadei bad ka jingkynnoh ba ngi iohnong lyngba kane ka jingphah ia ki briew sha kine ki jaka sumar, ngi kwah ban pyntip ba ki bun ki Longing kiba ka Seng ka iarap ban phah sha kine ki jaka sumar kidei kiba duna ha ka ioh ka kot, ki bym lah ban siew ia ka bai sumar kat kum ka jingdonkam bad kiba ka Seng ka hap ban ioarap ban iakren ia ki Nongpyniaid jong kine ki jaka sumar ba kin sngew synei banshim ia kum kine ki Nongpang ruh bad n aka liang ka Seng ka iarap pat lyngba ki marbam mardih kiba kiwei pat ki paradoh parasnam kiba don mynsiem ki ju wan ai lyngba u synniang kylluid myniem u jong ki sha ki Nongialam ka Seng. Ka Seng ne ki Nongialam kumba ngi lah pynpaw na ka por sha ka por ngim trei ban ioh ei ei na kane hynrei ngi trei namar ba ngi sngewkhia halor ka jinglong jingman n aka jingeh ba kum ka Jiadbynriew ngi iakynduh lyngba ka jingbun ki briew kiba kyrni ha u droks bad ngi ngeit ruh ba u Nongbuh Nongthaw u iohi ia ka jingmut jingpyrkhat bad ia ka kam ba ngi trei khlem shongthiat halor u droks bad ia kiba ki paidbah ruh nga ngeit skhem ki iohi ia kata.
Ngim lah ban len ba ka jingiakhun ka jong ngi pyrshah ia u droks ka lah long ka jingthut khamtam ia kito kiba kamai spah bad im lyngba kane ka kam. Ngi lah long ki mawjynthut ia kiba bun kita ki “Shohnoh” ne “ki Nongri-Thlen” kiba lah pynjot ia uba bun u dkhot jong ka Jaidbynriew bad kumba ngi lah pynpaw b aka pisa jong u droks kab da ki Spah bad hajar klur ka tyllun ha kane ka Jylla ka jong ngi bad lyngba kane jingmih ka jong ngi ban iakhun bad pynwit ia ki, ka lah ruh ban pynlong ba kine kin wad bad thaw ia kiba bun ki lad ban pynthohbria bad pynbudnam ia ka Seng lyngba ki khana lamler bad shu thaw ki jong ki pyrshah ia ki Nongialam bad ia Seng hi baroh kawei. Kin pynmih ruh ia shibun ki briew bad ki kynhun ki ban kynthoh pyrshah ia ka Seng nangne shakhmat ruh hynrei to tip tang kawei, ba ka HYC kan dang iai mih ban iakhun ia kane ka khlam pyrshah ia ka Jaidbynriew wat hapdeng shibun ki jingpynwit bad jingpynthut ia ngi. Ngi kyrmen ba u Nongbuh Nongthaw un don ryngkat bad ngi ha kane ka jingialeh i aka jingthmu ba bha bad ba u paidbah ka jaidbynriew ruh un don ha syndah jong ngi ha kum kane ka por bad ha kane ka jingialeh ka jong ngi.