Shillong: U nongaiktien ka sorkar, u bah Paul Lyngdoh mynta ka sngi, u la ong ba ka sorkar ka la dep rai ban pynkynriah ia ki nongdie madan mynta u bnai bad lada ka don ka jingpynjlan, ia kata um tip eiei.
Ha kajuh ka por, u la kyntait ia ka jingkam ki nongdie madan ba kim tip eiei ia ka jingthmu ka sorkar ban pynkynriah bad u la ong, ba ka jingialang halor kane ka la long bunsien ha ki por ba la leit ha kaba ki don ruh ki nongmihkhmat na ki nongdie madan bad ka jingkam jongki, ba kim tip eiei, ka long bym lah ban pdiang.
U bah Paul ula ong la don ruh ka Committee kaba kynthup ia ki nongmihkhmat na ki nongdie madan hynrei kaba sngew lyngngoh ba ki ong kam ju don jingialang.
U la ong ba ka tnad jngohkai ka kwah ban pynkylla dur ia ka Khyndai Lad ban lait na ki nongdie madan, ba kan long ka jaka ban iaid ban ieng, ban peitkai ki nongwankai hynrei ki jingtip bniah lah ban ioh na ka tnad pynroi sor bad ka Shillong Municipal Board .
Lah ban kdew ba hynnin ka sngi, ki nongdie madan kila pyllong ia ka jingleit tur sha ophis ka Shillong Muncipal Board ban pyrshah ia ka jingthmu ka sorkar ban pynkynriah na Khyndai Lad.
La rai ban pynkynriah ia ki nongdie madan na Khyndai Lad
