Shillong: Ka BCCI ka la bynshet ne pynkhamti ha u President ka Meghalaya Cricket Association u Naba Bhatarcharjee ban long kum u manager ka kynhun ialehkai kriket ki kynthei (Senior Women’s Cricket Team), kiban khreh ban hiar iakhun sha Australia na ka bynta ki 3 tylli ki jingialehkai ia ki ODI kaban long ha u bnai u ban wan.
Kane ka kynhun ki thei ialehkai ka India kin mih na Mumbai ha k 30 tarik mynta u bnai ba leit sha Brisbane, kaba dei artad ka jaka kaban pynlong ia ka ODI kaba nyngkong bad kaba ar kaban long ha ka 5 bad ka 8 tarik u nohprah ha madan Allan Border Field, katba ka odi kaba lai la buh ban long ha kawei na ki mdan ialehkai ba la pawbha katta ka madan WACA kaba don ha sorbah Perth ha ka 11 tarik u nohprah.
Kane ka jingiakhun ka long kum shi bynta ka 2022-2025 ICC Women’s Championship, ha kaba ia ka kynhun ki thei ialehkai ka india yn lam khmat ne kapten ia ka da ka Harmanpreet Kaur kiatba ka Smriti Mandhana la jied ia ka kum ka vice captain jong ka kynhun.
Kum uwei na ki nongkitkam ba shit rhem bha ia ka kriket, u Naba Bhatacharjee udei u nong maitphang naka bynta ka jingkyntiew ia kane ka jingialehkai hangne hapoh ka jylla Meghalaya , ha kaba u la ioh lad ban trei kumba 15 snem ha ka NADP (New Area Development Programme) Committee jong ka BCCI naduh u 2016 bad u dei uwei na ki dkhot ba 7 ngut ka BCCI Committee ryngkat lang ki nongialam ba pawkhmat kum u Shah, Rajeev Shukla, Saurav Ganguly bad kiwei kiwei
Ha u snem 2017 ula shah jied ban long kum u dkhot nka bynta ban peit bad khmih bniah ia ka kaiphod jong ka Justice RM Lodha Committee, kaba dei lyngba kane, kaba la plie lad ia ka jylla Meghalaya bad san tylli kiwei pat ki jylla ki thain shatei lam mihngi jong ka ri ba kin ioh ia katta ka hok long dkhot kiba pura ha k BCCI.
Shuh shuh u Naba u la shah jied ban long kum uwei na ki dkhot jong ka kynhun kaban peit bad khmih ia ki rtylli ki jingiakhun ha u snem 2016 hapdeng ka India pyrshah ia ka West Indies, kaba la long ha sorbah Florida, kum shi bynta ban prat lynti naka bynta ban kyntiew ia kane ka jingialehkai ha USA.