Shillong: Kum shi bynta ka jingrakhe Audit Week 2024, la plie paidbah ia ka rynsan e-Pension ba thymmai jong ka Ophis u Accountant General (A&E), Meghalaya mynta ka sngi da u John K Sellate, Pr Accountant General (Audit) bad Director General, Regional Capacity Building and Knowledge Institute, Shillong.
Ha ka jingai jingkren ha kane ka sngi, u Sellate u la ban jur halor ka jingkongsan jong kane ka sienjam ban wanrah ia ka jingshai bad ka jingseisoh ha ka kam sam bai bam tymmen. “Ka jingplie ia ka rynsan bai bam tymmen ka long kum u mawmer ha ki jingpyrshang jong ngi ban ai ka jingshakri kaba kham bha ia kito kiba ioh bai bam tymmen. Ngi ieng skhem na ka bynta ka jingpynsuk ia ka kam bai bam tymmen bad ban pyllait katba lah ia kane na ki kynjnit kynjnat,” u la ong. Ka rynsan bai bam tymmen ka la treikam mynta bad lah ban pyndonkam ia ka lyngba ka [https://epension.megonline.nic.in].
Ha kane ka juh ka sngi, u Bah C H Kharshiing, Pr Accountant General (A&E), Meghalaya u la plie paidbah ia ka jingai jingshakri lyngba ki SMS kaba thmu ban pynsted ia ka jingpynkhreh ia ki kot ki sla na ka bynta ka bai bam tymmen jong ki nongtrei jong ka jylla ki ban shongthait.
Kane ka jingai jingshakri lyngba ki SMS kan ai jingtip man u bnai ia ki nongtrei jong ka jylla kiba shongthait bad ki Controlling office jong ki shaphang ka jingpynbiang ia ki kot ki sla kiba iadei bad ka bai bam tymmen. Kane ka sienjam ka dei kaba la saindur ban pynduna ia ki jingpynslem lyngba ka jingiakren kaba kham bha hapdeng ka ophis AG bad kito kiba shong thait na ka kam.
Ha ka jingai jingkren, u Bah Kharshiing u la kdew ia ka jingkongsan jong kane ka jingai jingshakri ban pynbha shuh shuh ia ka kam ban pynshisha ia ki bai bam tymmen. “Ka jingwanrah ia ka jingai jingshakri lyngba ki SMS ka dei ka sienjam kaba heh na ka bynta ka kam bai bam tymmen kaba kham seisoh bad kaba kham suk ban pyndonkam. Ngi ieng skhem ban ai ka jingshakri kaba biang tam ia kito kiba la shongthait na ka kam bad kane ka sienjam kan iarap ia ngi ban pynurlong ia kane ka thong,” u la ong.
Kane ka rynsan ka dei ka sienjam kaba heh ban kyntiew ia ka jingseisoh bad ka jingioh bynta ha ki jingai jingshakri kiba iadei bad ka bai bam tymmen na ka bynta ki nongtrei jong ka jylla bad la saindur ia ka ban pynsuk ia ka kam ia kiba la shongthait na ka kam, ki Ophis Treasury bad Drawing bad Disbursing, kaba plie lad ia ki ba kin ioh ia ki jingtip shaphang ka bai bam tymmen, ban buddien ia ki jingbuh application, bad ka jingioh jingtip ha ka por kaba biang. Kane ka sienjam ka dei shi bynta ka jingieng skhem ka Indian Audit bad ka tnad Accounts ban pyndonkam ia ka teknoloji ban pynbha shuh shuh ia ka jingai jingshakri ia ki paidbah.
Plie ka Accountant General Meghalaya ia ka rynsan e-Pension lyngba ka SMS ban pynsuk ia ka bam tymmen
