Shillong: U Acting Vice Chancellor ka skulbah NEHU u Prof Nirmalendu Saha ula ong ba ka tnad pule puthi ka sorkar India ka la pynthikna ban shim kam mar ia ioh ia ka kaiphod jong ka kynhun tohkit kaba la thung ban aiti hapoh 15 sngi.
Haba kren sha ki nongthoh khubor, u Prof Saha ula ong ba ula ioh ia ka jingkyrpad na ka tnad pule puthi ka sorkar India ban ai ia ki kot ki sla sha ka Kynhun Tohkit kiba iadei halor ki jingeh ba la wanrah da ki samla pule, ki nonghikai bad ki nongtrei jong ka skulbah NEHU.
U la iathuh ba ula thaw ia ka Committee kaba rit ban pynbiang ia ki kot ki sla na ka liang ka skulbah khnang ba kane ka kynhun tohkit kaba don ar ngut ki dkhot kin lah ban leh ia kaba donkam.
Ula ong ba kane ka kynhun tohkit kan wan sha NEHU bad ban sngap ia ki jingeh jong ki kynhun naduh ki nonghikai, ki samla pule, ki nongtrei.
U Prof Saha ula pyntip ba kila ai por haduh 5baje janmiet ha ka sngi nyngkong ban aiti ia ki kot ki sla sha ka tnad pule puthi ka sorkar pdeng.
Ka tnad pule ka sorkar India ka la pynthikna ban leh kam katkum ka jingshem ka kynhun tohkit: Acting VC NEHU
