Shillong: Ka KHADC kan sa pan jingshai na ka dorbar shnong Madanriting bad ka Hima Mylliem halor ka jingioh thied jaka u jaitbynriew Meitei ha Madanriting ha u snem 1984.
Haba kren sha ka lad pathai khubor, u Deputy CEM ka KHADC u bah Pynshngain N Syiem ula ong ba la ioh pdiang ia ka jingthoh na ka HNYM halor ka jingioh thied jaka u jaitbynriew bym dei Khasi-Jaintia bad Garo ha Madanriting bad halor kane, ka Council ka la bynshet ha ka Land Department, ban buddien ia kane.
Halor ka jingai por ka HNYM shi taiew ban pyndep ia kane ka kam, u bah Pynshngain ula ong ba kam long kaba suk ban leh wut wut hapoh shi taiew ia kane ka kam namar ba tang shu bakla, lah ban shah rem pynban bad ka donkam ban pynkhlain shwa ia ka Nongrim khnang ban lah ban iaid shakhmat.
“Ngin thoh sha ka dorbar shnong Madanriting bad ka Hima Mylliem ban pan jingshai ha kano ka rukom, une u bar jylla ula ioh thied jaka”, la ong u bah Pynshngain.
U la bynrap, “Lada dei ba u Rangbah Shnong uba ai NoC u dang long rangbah shnong, ka Council kan phah weng syndon hynrei namar ba um long rangbah shnong shuh, ka Council kan leh ia kawei ka bynta pat”.
U la ong ba ka jingwan tur sha KHADC da kaba shim kabu, kam long kaba dei bad kan ktah ia ka jingtreikam ka Council bad ka jingjulor ia ki mar ki tiar. “Ngi la don ka jingiakren ban ujor ejahar hynrei namar ba kam don kano kano ka jingjulor, ngi khlem ujor ejahar shuh”, u la ong.
U la ong ba namar ba ka jinglaitluid palat ka jingrung jingmih ha KHADC, ka Council ka lah ban pulit na ka sorkar ban ap pahara.
Yn pan jingshai ka KHADC na ka Madanriting ba ioh thied jaka u Meitei
