Shillong: Hadien ba ki san shnong bad kiba Marjan kila pyrshang bunsien ban leit pan kali kit nongpang na ki nongmihkhmat kam shym la urlong, mynta ka sngi kila sngew kmen ba kila ioh pynban na ka Hima Marbisu lyngba ka jingshim khia u Sirdar.
Ia kane ka kali kit nongpang kaba la pynioh ka Hima, la pyllait da u Sirdar u bah Starsing Kurbah ha ka jingialang ha shnong Mawpunrum, kaba hap ha Sohiong konstitwensi ha ka MLA bad ha Mawphlang-Diengiei ha ka MDC.
Kine ki san shnong ki kynthup ia ka Mawpunrum, Mawpunneng, Mawpunneng A, Lyngwa bad ka Lum Mynsain kiba hap ha ka Hima Marbisu.
Haba kren ha kane ka jingialang, u Sirdar u bah Starsing ula kyntu ia kiba shimti ban pyniaid ia kane ka kali kit nongpang ba kim dei ban pyndonkam bakla, ban kit kyiad, ban ieng rud surok, ne ban leh ia ki kam awria.
U la ong ba ka jingai ia kane ka kali kit nongpang kam dei tang ia kane ka san shnong hynrei ia ki paidbah kiba donkam hok shisha.
Ki nongkitkam shnong jong kine ki san shnong kila pynpaw ia ka jingsngew nguh ia ka jingshemphang u Sirdar ban pynioh ia kane ka kali kaban ai jingmyntoi shisha ia kiba duk kiba jynjar ha ka por ba ki donkam.
Ki la ong ba ha kine ki snem ba la leit, kila ju leit ud leit kyrpad na ki nongmihkhmat ban iarap ban pynioh ambulance hynrei kam shym la urlong satia. Hynrei kila pynpaw ia ka jingkmen ia ka jinglah ka Hima ban leh ia kane ka kam kaba khraw.
La sakhi lang ha kane k sngi da ka jingdon lang ki nongialam shnong na ki shnong ba marjan, ki nongialam sengbhalang, ki nonghikai bad ki khynnah skul nalor ki nongshong shnong.
Kumban shu pynkynmaw, kine ki san shnong ki hap ha Sohiong konstitwensi ha ka MLA hynrei ha ka MDC ki hap sha ka Mawphlang-Diengiei konstitwensi.
La thait ban pan na u MLA/MDC, ioh ambulance ka thain Mawpun na ka Hima Marbisu
