Shillong: Ka shnong Umru ka don ha them ri Bhoi mihngi bad ka don ha khappud bad ka Assam, ha kaba ka don ka jingiatan tyllai na ka jingiakam ia katei ka jaka.
Namar kane ka daw, haba ki skhim ki wan na Meghalaya, bunsien ka Assam ka ujor bad kila sahngeh noh shwa bad kane ka la ktah ia ka roi ka par jong katei ka them kaba seisoh bad kaba itynnad.
Ka shnong Umru ka jngai tang kumba 1km eiei na Tyrso bad ban poi sha kane ka shnong, hap ban iaid da ka surok khohruh khohram bad kane ka shnong ka hap ha Mawhati konstitwensi.
U Rangbah Shnong ka Umru u bah Daktring Mangu u la ong ba haba phai sha ka roi ka par, ka shnong ka la pyrshang ban shna ia ka Community Hall na Meghalaya hynrei ka don ka jingjor na ka Assam bad ym lah ban pyndep. U la ong ba ki nongshong shnong khamtam ki Khasi ki kwah beit ba ka Umru ka dei ban don sha Meghalaya, wat haduh mynta, ki Job Card la ioh na Meghalaya hynrei ym ioh ban pyndep ia ki jingtrei ba shah ujor ha ka Assam.
U la iathuh ba ha kane ka shnong, kumba 35 tnum ïing ki dei ki Khasi, katba 100 eiei ki tnum iing ki dei jong ki Nepali.
Haba kren bad ki longkmie, kila iathuh ba ka jingeh ka long ba haba wanrah skhim na Meghalaya, ka Assam ka pyrshah beit. Kila pyntip ba ki pulit ka Assam ki pyrshah ba wanrah ia ki skhim na Meghalaya kum ka jingshna ia ka iing dorbar, ka iing skul bad ka jingshna surok.
Ka Umru ka don ha ka jingiatan tyllai, ngi kwah sha Meghalaya: Rangbah Shnong
