Da u Myntri Rangbah Duh Narendra Modi
Mynta la dap shi bnai naduh ba u Ratan Tata u la ieh noh iangi. Naduh ki nongbah haduh ki shnong ba rit, ka jingduh ia u ka dei kaba ngi sngewthuh ha baroh ki bynta jong ka imlang sahlang. Ki trai karkhana, ki nongseng kam lajong, ki nongtrei kiba trei shitom ki sngewsih namar ka jingduh noh ia u. Kito kiba ieid ia ka mariang bad kiba noh synniang na ka bynta kiwei ruh ki sngewsih bha. Ka jingduh ia u ka dei kaba ngi sngewthuh ym tang ha ka ri hynrei wat ha kylleng ka pyrthei ruh.
Naduh ki por ba u dang samla, u Ratan Tata u dei uba ai mynsiem, uba pynkynmaw ba dei ban beh ia ki thong bad ba ka jingriewspah ka lah ban iaid lang bad ka jingsngew rit. Ia kiwei pat, u long kum ka nuksa jong ka jinglong ba bha tam jong ki kam ka India bad ka jingieng skhem na ka bynta ka burom, ka jingtbit bad ka jingai jingshakri. Hapoh ka jingialam jong u, ka Tata Group ka la kiew sha ki kliar ba thymmai bad ka long ka dak jong ka jingburom, ka jingkhuid mynsiem bad kaba baroh ki shaniah ha kylleng ka pyrthei. Wat hapdeng kine baroh, um ju sngew sarong ia ki jingjop, u long uba leh rit bad uba leh bha ia kiwei.
Ka jingkyrshan u Ratan Tata ia ki jingthrang jong kiwei ka dei kawei na ki jinglong ba bha tam jong u. Ha kine ki snem ba la dep u la paw namar ka jingialam lynti jong u ia ki kam StartUp jong ka India ha kaba u la bei tyngka ha ki kam bapher bapher. U la sngewthuh ia ki jingthrang jong ki samla ba seng kam lajong bad u la ithuh ia ka lad ba ki don ban tei ia ka lawei jong ka India. Da kaba kyrshan ia ki jingpyrshang jong ki, u la pynkupbor ia ki samla ba don jingthrang ba kin shim ia ki sienjam ba shlur ha ki kam bapher bapher. Kane ka la iarap bha ban tei ia ka jinglong jingman kaba bun ka jingsaindur thymmai bad ka jingseng kam lajong, bad nga ngeit skhem ba kane kan dang iarap ia ka India da ki phew snem ban wan.
U ju ieng skhem na ka bynta ka jingtbit ha ka kam, bad u ju pynshlur ia ki kam ha India ba kin long ki nuksa ia ka pyrthei. Kane ka jingthmu, nga kyrmen, kan ai mynsiem ia ki nongialam ban wan ba kin pynlong ba ka India kan iadei bad ka rukom treikam kaba biang tam ha ka pyrthei.
Ka jingkhraw jong u kam dei tang ha ki kamra ba pynlong jingialang ne ka jingiarap ia ki briew. Ka jingieid jong u ka dei na ka bynta baroh ki jingim. Ka jingieid jong u ia ki mrad ka dei kaba la paw bha bad u ju kyrshan ia ki kam na ka bynta ka bha ka miat jong ki mrad. U ju iasam ia ki dur jong ki ksew jong u kiba long ka bynta kaba heh bha ha ka jingim jong u. Ka jingim jong u ka pynkynmaw ia ngi baroh ba ka jinglong nongialam ba shisha kam dei tang shaphang ki jingjop, hynrei ka dei ruh ka bor ban don jingsngew na ka bynta kito kiba iashem jingeh duh.
Na ka bynta ki klur ngut ki briew ka India, ka jingieid ri u Ratan Tata ka la paw bha ha ki por ba don ki jingeh. Ka jingplie biang kaba sted jong u ia ka Taj Hotel ha Mumbai hadien ki kam lehnoh ha u 26/11 ka la long kum ka jingpyrta ia ka ri – ba ka India ka long kaba iatylli, ka bym nguh hakhmat ki kam pyntriem.
Nga dei uba donbok ban ithuh bha ia u katba dang iaid ki snem. Ngi la iatrei lang ha Gujarat, ka jaka ba u la bei tyngka bha, ha ki projek ba u kheinkor bha. Ha kine ki taiew ba la dep, ng la don ha Vadodara bad u President jong ka Sorkar Spain, u Pedro Sánchez bad ngi la plie paidbah lang ia ka jaka ban shna ia ki liengsuin C-295 ha India. U dei u Ratan Tata uba la sdang ban trei na ka bynta kane. Ngi la kynjah bha namar ka jingbym don lang u Ratan Tata.
Nga kynmaw ia u Ratan Tata kum u briew uba sngewtynnad ban thoh jingthoh – ha kaba u ju iakren bad nga man ka por shaphang ki kam bapher baper, la ki dei ki kam Sorkar, ka jingsngewnguh na ka bynta ka jingkyrshan ka Sorkar, lane ki jingkitbok jingkitrwiang jong u hadien ki jingjop elekshon.
Ki jingiakren jong ngi ki la bteng hadien ba nga la leit noh sha ka nongbah bad u la bteng ban iatreilang ha ki kam ban tei ia ka ri. Ka jingkyrshan u Ratan Tata ia ka Swachh Bharat Mission ka dei kaba nga niewkor bha. U ju kren bha shaphang kane ka kam paidbah namar u la sngewthuh ba ka jingkhuid, ka jinglehkhuid ka long kaba kongsan na ka bynta ka jingkiew shaphrang ka India. Nga dang kynmaw ia ka video message jong u na ka bynta ka jingdap shiphew snem ka Swachh Bharat Mission ha u Risaw. Kane ka dei kawei na ki sien kiba khatduh ba u la kren bad ki paidbah.
Sa kawei pat ka kam ba u ju niewkor bha ka dei ka kam ai jingsumar khamtam ka jingiakhun pyrshah ia ka jingpang cancer. Nga kynmaw ia ka prokram ha Assam ar snem mynshuwa ha kaba ngi la plie paidbah lang ia ki cancer hospital ha ka jylla. Ha ka jingai jingkren jong u ha kato ka por, u la ong ba u kwah ban aiti ia ka por ba u dang don na ka bynta ka kam ai jingsumar. Ki sienjam jong u ban plie lad ia ka jingioh jingsumar cancer ka wan na ka jingdon jingsngew jong u na ka bynta kito kiba ialeh bad ki jingpang, namar ba u ngeit ba ka imlang sahlang kaba bha ka dei kata kaba ieng na ka bynta ki dkhot kiba iashim jingeh tam.
Haba ngi kynmaw ia u mynta, ngi kynmaw ia ka imlang sahlang ba u thrang ban iohi – ha kaba ki kam khaii pateng ki lah ban wanrah ia ka jingbha, ha kaba ki sap jong baroh ki dei kiba niewkor bad ha kaba ka jingjop ka dei kaba peit lyngba ka bha ka miat bad ka jingkmen jong baroh. U dang sah ha ka jingim jong kito ba u la iarap bad ki jingthrang ba u la pynurlong. Ki pateng ban wan kin sngewnguh ia u namar ka jingpynkylla ia ka India sha ka ri kaba kham bha, kaba kham don jingsngew ia kiwei bad kaba kham bun ki lad ki lynti.
U Ratan Tata u long nuksa ia ki pateng jong ki samla
