Shillong: U President ka NEHUTA u Prof. Lakhon Kma ula pynpaw ia ka jingbym iahap ia ka jingleit tuklar ka seng Voice of the People Party (VPP) ha ka por ba ki samla pule ki dang iakhih.
Haba kren mynta ka sngi, u Prof. Lakhon ula ong ba wat ki nonghikai ka NEHU ruh kim kwah ban tuklar. U la ong ba ka jingleit kynduh ka VPP ia u Vice Chancellor ka dei ha ka por kaba bakla bad kam iahap satia.
U la ong ba ki paidbah ki dei ban kyrshan ia ka jingiakhih khlem da niew ne shim burom ha ka kyrteng kano kano ka seng ne ka kynhun bad ka jingleit ban kynduh ha ophis u VC ha ka por kaba bakla, ka la pynmong ia ki samla pule.
U la ong ba kino kino kiba leit sha NEHU, ki dei ban iakynduh ia ki nongialam ka seng samla pule ban sngewthuh ia ki jingeh jongki.
Lah ban kdew ba hynnin ka sngi, ka VPP kala shah beh ha ka NEHUSU hadien ba ki la leit ban kynduh ia u VC. Ki samla pule kila pyllong ia ka jingiakhih shah thngan ban dawa weng ia u VC hadien ba ula pyneh ban weng kam ia u Registrar, bad Deputy Registrar.
Leit kynduh ka VPP ia u VC ha ka por ba bakla: Prof. Lakhon
